Pasi Willem II ia kishte shkëputur kontratën për shkak të problemeve me disiplinë, Donis Avdijaj iu bashkua këtë verë skuadrës turke, Trabzonspor. Mirëpo, problemet e njëjta e kanë ndjekur reprezentuesin e Kosovës në Turqi.
Dje Donis Avdijaj debutoi me klubin e tij të ri, Trabzonsporin, në ndeshjen kundër Hellas Veronas të Amir Rrahmanit. Megjithatë, mediat turke raportuan për një lajm më të keq për shquiptarin.
Sipas mediumeve në Turqi, bordi i drejtuesve të gjigantit turk i ka dhënë vërejtje Avdijajt, pasi që ai nuk kishte marrë leje për të dalë në një klub nate. Këtë veprim të kosovarit e kishte zbuluar kapiteni i skuadrës, Joao Pereira, i cili i ka kërkuar klubit ta gjejë një zgjidhje për të mos lejuar probleme të tjera të tilla.
Avdijaj ishte lojtar i lirë që nga marsi, pas shkëputjes së kontratës nga ana e Willem II, për arsye disiplinore. Por, tani ai do të vazhdojë karrierën në Turqi, ku ka nënshkruar kontratë trevjeçare me opsion për ta zgjatur atë edhe për një vit tjetër.
