Mbrojtësi shtatlartë Elis Doksani është larguar nga Bylisi, aty ku në pjesën më të madhe të sezonit ka luajtur si titullar. Doksani ka qenë edhe më parë pjesë e ballshiotëve dhe ka luajtur me ekipin e Dinamos. Mbrojtësi 21- vjeçar nuk luajti as në miqësoren me Tiranën në kryeqytet.
Doksani ka debutuar me Bylisin në moshën 17-vjeçare ndaj Partizanit në Superiore, ndërkohë që ka luajtur me Kombëtaret e moshave deri tek U-21. Ka qenë vetë mbrojtësi që e ka marrë një vendim të tillë, duke e konfirmuar edhe në profilin e tij në “Instagram”.
Duhet theksuar se Bylisi afroi pak ditë më parë Eltun Turabov nga Azerbajxhani, ndërkohë që po synon edhe të paktën dy mbrojtës të tjerë. Analizë dhe miqësore – Bylisi nuk ka bërë pushim dhe menjëherë pas disfatës me Tiranën në kryeqytet, ballshiotët kanë zbritur sërish në fushën e stërvitjes. Por trajneri Dovedan dhe stafi u kanë kërkuar lojtarëve më shumë përqendrim dhe vlerësim në miqësore e sidomos në ato me ekipe të elitës. Bylisi bëri një paraqitje me dy tablo, në pjesën e parë skuadra i rezistoi mjaft mirë kundërshtarit dhe repartet funksionuan.
Aktivizimi i të gjithë lojtarëve, madje edhe të rinjve bëri që skuadra të mos funksiononte siç pritej. Bylisi ka planifikuar miqësoren e radhës, e cila do të luhet me Besën e Kavajës, një skuadër me pretendime. Ky test ka gjasa të zhvillohet sot në Kavajë.