Shpenzoi 300 milionë për blerje, 90 ditë pas Reali i Zidane do të jetë ai i sezonit të kaluar - Bota Sot
Shpenzoi 300 milionë për blerje, 90 ditë pas Reali i Zidane do të jetë ai i sezonit të kaluar

Futboll

Shpenzoi 300 milionë për blerje, 90 ditë pas Reali i Zidane do të jetë ai i sezonit të kaluar

Më: 16 gusht 2019 Në ora: 17:55
Zinedine Zidane

Reali do ta nisë sezonin e ri pa Eden Hazard, blerjen më të madhe të verës dhe ndoshta, i vetmi që zë vend në 11-shen aktualisht te Los Blancos, edhe pse Zizu ka shpenzuar 300 milionë euro.

19 maj 2019, ishte dita kur Madridi i dha fund një sezoni zhgënjyes, duke e mbyllur atë me humbje në “Santiago Bernabeu (Real vs Real Betis 0-2) – disfata e 18 në sezonin 2018/19 (sezoni i dytë më i dobët në historinë e klubit).

U fol shumë se Reali do të bëjë revolucion, për çka me të vërtetë kishte nevojë pas triumfit të trefishtë në Champions League. Madje vet Zidane insistonte “do të bëjmë ndryshime”.

Por, 90 ditë pas, Real Madridi i Zinedine Zidane do të jetë pothuajse i njëjti, pavarësisht çmendurisë në merkato, që ka shpenzuar mbi 300 milionë euro.

Të shtunën kundër Celta Vigos (17 gusht 2019), Reali do të jetë pa blerjen më të madhe të verës, Eden Hazard dhe po ashtu pa Ferland Mendyn, që u ble për 50 milionë euro – edhe pse ky i fundit vështirë se do ta zërë ndonjëherë vendin e të preferuarit të Zizus, Marcelo.

Blerja tjetër në mbrojtjeje është Militao, por edhe ai vështirë se do të ketë minuta para kampionit të botës, Raphael Varane e një ndër mbrojtësve më të mirë në histori dhe kapitenit, Sergio Ramos.

Reali shpenzoi 100 milionë euro në mbrojtje për bankën rezervë, pasi si Militao ashtu edhe Mendy, pritet të përdoren vetëm për rrotacione dhe kur Zizu dëshiron t’i pushojë të preferuarit e tij.

Mesfusha është pjesa ku Reali nuk ka investuar ende, derisa ka larguar dy; Marcos Llorente e Dani Ceballos, ndërsa sa i përket sulmit, pa Eden Hazardin, mbetet Luka Jovic lojtari i vetëm nga ardhjet e reja që mund të luajë të shtunën nga minuta e parë në mungesë të belgut, edhe pse raportohet se Zidane do t’ia japë një shans të rikthyerit nga huazimi, James Rodriguez, e ndoshta edhe Gareth Bale, për të cilët sot tha “llogaris në ta si në gjithë lojtarët tjerë. James po punon shumë, është në formë, jam i lumtur për të”.

Pra, të shtunën, Reali ndeshjen e parë do ta nisë pothuajse me ekipin që edhe e përfundoi, edhe pse Madridi është klubi i vetëm që ka shpenzuar mbi 300 milionë euro.

300 milionë euro për lojtarë që do të qëndrojnë më shumë në stol, me të vetmin Eden Hazard që e ka të garantuar vendin në 11-she.

Zinedine Zidane sipas mediave spanjolle, nuk ka punuar ashtu siç duhet në merkato dhe kjo, natyrisht se gjatë sezonit do t’i shkaktojë shumë kokë dhembje, nëse Paul Pogba dhe Neymar nuk aterojnë në “Santiago Bernabeu”. 

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...