Feronikeli e ka fituar derbin e xhiro se tretë në Superligë ndaj Prishtinës, të cilën e mposhti 1:0 fal një goli të realizuar nga Mendurim Hoti.
Pas takimi, ka folur trajneri i Prishtinës, Mirel Josa në lidhje me humbjen ndaj Feronikelit.
“Është shqetësuese mos këmbëngulja e futbollistëve dhe me të vërtetë është për tu çuditur mungesa e vetëbesimit sidomos në këto ndeshjet e para të kampionatit. Kemi bërë disa ndryshime sot, qoftë në sistemin e lojës apo edhe individë, madje edhe duke rrezikuar me dy sulmues në 25 minutat e fundit, por që nuk dhanë frytet e veta. Humbasim topa në disa zona që nuk duhej humbur. Patëm mungesë ekuilibri në krahët e mbrojtjes, sidomos në krahun e majtë, aty ku i krijuan shumë zbrazëtira dhe kundërshtari na sulmonte pikërisht aty”, deklaroi Josa për “Super Sport Kosova”.
Josa u ka bërë thirrje futbollistëve të tij për këndellje, pasi që ky kampionat po duket të jetë shumë i vështirë.
“Kishte mungesë bashkëpunimi në repartin sulmues dhe kur humbasim topat në atë zonë është e rrezikshme pasi që kundërshtari krijon diferencë numerike në kontra aksion. Është një kampionat i vështirë dhe ne duhet të rikuperohemi”, përfundoi Josa.
Pas tri xhirove, Prishtina ka grumbulluar vetëm një pikë por që ka një ndeshje më pak, atë ndaj Dukagjinit.