Skuadra e Barcelonës nuk do të ketë për një muaj talentin e saj, sulmuesin 16-vjeçar Ansu Fati. Sipas të përditshmes Marca, lojtari “blaugrana” vendosi që të luajë për kombëtaren spanjolle, duke refuzuar ofertat që i kishin ardhur nga Portugalia dhe Guinea-Bissau.
Për pasojë, Ansu Fati është ende duke përshpejtuar procedurat për të marrë pasaportën spanjolle. Kjo, për arsye se më datat 26 tetor-17 nëntor të këtij viti do të zhvillohet në Brazil Kampionati Botëror U-17 në futboll.
Ansu Fati pritet të jetë pjesë e kombëtares U-17 të Spanjës në këtë turne, çka do të thotë që ai do të mungojë te skuadra e Barcelonës për një muaj. Kjo mund t’i kushtojë shumë trajnerit Ernesto Valverde, që do të humbasë talentin për rreth 10 ndeshje, në Spanjë dhe Europë.
