Paris Saint-Germain ka vuajtur, por në fund ka arritur të marrë një fitore të rëndësishme 1-0 në fushën e Lyon falë Neymar.
Braziliani, i kthyer në formacionin titullar pasi nuk luajti kundër Real-it në Champions për shkak skualifikimi, ka qenë kërcënimi numër një për vendasit, të cilët janë munduar ta ndalin me faulle të njëpasnjëshëm.
Një strategji kjo që ka funksionuar deri në minutën e 87-të, kur "O Ney" ka treguar edhe njëherë pse është lojtari më i shtrenjtë në historinë e futbollit.
Pas një topi të marrë në zonën e rreptësisë nga Angel di Maria, numri dhjetë i miqve ka arritur të gjejë golin me një lëvizje magjike, pavarësisht se ka qenë i rrethuar nga tre mbrojtës kundërshtarë.
PSG kryeson renditjen me 15 pikë pas kësaj fitoreje, ndërsa Lyon mbetet në vendin e nëntë me 8 pikë.