Në IPKO Superligën e Kosovës luhen këtë të diel tri përballjet e fundit të javës së 7-të, ku pa dyshim vëmendjen kryesore shkon për derbin e Anamoravës, Gjilani – Drita, që do të zhvillohet në orën 15:00.
Një përplasje, si gjithmonë tepër “e nxehtë”, falë edhe atmosferës që jashtëzakonshme që krijojnë të dyja tifozëritë. Sigurisht që mbështetësit e Gjilanit, “Skifterët”, do të jenë më të shumë të numër, si pritës, megjithatë edhe “Intelektualët” nuk do t’i lënë gjë mangët kësaj atmosfere unike të futbollit kosovar.
Gjilani dhe Drita e kanë nisur mirë këtë edicion, çka tregon ambiciet maksimale që kanë të dyja skuadrat për titullin kampion. Ky rivalitet në klasifikim e bën edhe më interesantë këtë derbi, ku pritshmëritë në të dy kampet janë të mëdha.
Derbi i Gjilanit do të gjykohet nga Besfort Kasumi, ndërsa ndihmë të tij do të jenë Edomnd Zeqiri dhe Fatmir Sekiraqa, ndërkohë gjyqtari i katërt është përzgjedhur Alban Shala.
Në të njëjtën orë (15:00), Prishtina, pas kthesës me tri fitore radhazi, do të ketë një takim të vështirë në fushën e Vushtrrisë. Vendasit nuk po kalojnë një situatë të mirë dhe kanë nevojë për pikë, ndërkohë kryeqytetasit synojnë që të marrin fitoren e katërt radhazi.
Ndërkohë në Skenderajm në orën 14:00, do të zhvillohet një përballje mjaft interesante mes Drenicës dhe Ballkanit, dy skuadra që luajnë futboll jashtëzakonisht të bukur.
Ndeshjet e së dielës
Drenica – Ballkani 14:00
Vushtrria – Prishtina 15:00
Gjilani – Drita 15:00
