Legjenda braziliane, Rivaldo, ka folur sërish për bashkatdhetarin e tij, Neymar.
Ai këmbëngul se 27-vjeçari duhet të largohet nga PSG, ku e ka të pamundur të realizojë ëndrrën për t’u bërë futbollisti më i mirë në botë. Kampioni i botës më 2002 vlerëson se Neymar nuk ka marrë një vendim të mirë kur shkoi në Francë: “Neymar duhet të kishte zgjedhur klube me traditë më të madhe europiane, siç është Real Madridi, Barça, ose ndonjë skuadër angleze apo gjermane".
Problemi kryesor, që Rivaldo nuk e fsheh, është se PSG nuk është e aftë për të fituar Ligën e Kampionëve, një turne që do të ndikonte, madje shumë, në ngritjen e Neymar në majë:
"Fitimi i Ligës së Kampionëve ia bën më të lehtë objektivin Neymar, ai do të jetë më i miri në botë".
Për të shpjeguar se çfarë vendimi duhet të marrë lojtari, legjenda braziliane shtoi: "Gjëja e duhur është e qartë; të bëjë atë që bëri Ronaldinho, të lërë PSG dhe të kthehet te Barcelona. Atje do të bëhet ndër më të mirët në botë". Përkundër gjithçkaje, Rivaldo nuk dyshon se ylli i PSG ka ende shumë karrierë përpara, pavarësisht gabimeve: "Ne jemi njerëz, ndonjëherë gjërat shkojnë keq. Unë mendoj se Neymar gaboi që la Barcelonën për të shkuar në Paris, por mund ta rregullojë tani”.
