Pas pauzës së ndeshjeve të kombëtareve, me ndeshjet e fundjavës vazhdon java e parafundit e stinorit vjeshtor, apo e 16-ta me radhë. Prishtina do t’i pres rivalët e Trepçës ’89 nga Mitrovica, skuadër kjo të cilën Prishtina këtë edicion e ka mposhtur në “Riza Lushts” 1:0.
“Edhe pse bardhekaltrit renditen të 4-të me 27 pikë, 7 më shumë se ‘minatorët’ që renditen të 8-të buzë pozitave të rrezikshme në klasifikim, ndeshja konsiderohet jashtëzakonisht e rëndësishme dhe ku skuadra mitrovicase, pa marrë parasysh rezultatit, paraqitet përherë denjësisht. Prishtina do të vuaj vetëm mungesën e mbrojtësit Haliti, ndërsa në grumbullim rikthehen Bekteshi dhe Mankenda, ndërsa skuadra nuk ka mungesa të kartonëve”, bëhet e ditur nga faqja e FC Prishtina.
Ballafaqimi mes Prishtinës dhe Trepçës ’89 luhet nesër në orën 14.00 në stadiumin “Fadil Vokrri” në Prishtinë, ndërsa ndeshjen e drejtojnë gjyqtarët Mervan Bejtullahu, Fatlum Jashari, Elvis Bicaj dhe Dardan Çaka. Futbollisti i Prishtinës, Meriton Korenica, ka deklaruar se do të jetë ndeshje mjaft e vështirë por beson në tri pikë të reja.
“Pas pushimit që kishim, besoj jemi përgatitur maksimalisht për ndeshjen e radhës kundër një kundërshtari të fort dhe të papërshtatshëm siç është Trepça ’89 e cila din të nxjerr shumë probleme. Megjithatë duke e parë formën tonë të mirë, atmosferën e shkëlqyer në skuadër, por edhe me angazhimin siç e patëm në ndeshje me Llapin, besojmë se do të arrijmë t’i marrim pikët e plota çka do të na ndihmonte shumë në ecurinë pozitive deri në fund të stinorit”, ka thënë Korenica.
Nga ana tjetër, Trepça ’89 e ka më së të qartë se sa vështirë do të jetë kundër Prishtinës që është në formë. Kryetrajneri mitrovicas, Shpëtim Idrizi, do të orvatet që të dalin të pamposhtur nga kryeqyteti.
