Mesut Ozil nuk ka ndërmend ta rishohë (ndërpresë) kontratën e tij me Arsenalin. Gjermani ka zbuluar se qëllimi i tij është të qëndrojë me “Topçinjtë” deri në verën e vitit 2021, kur fituesit të Kupës së Botës i skadon marrëveshjen aktuale në “Emirates Stadium”. Një kontratë fitimprurëse, e nënshkruar në janar 2018, e cila ka ngjallur shumë debate në veri të Londrës. Shumëkush ka sugjeruar që fondet e investuara për Ozil mund të ishin përdorur më mirë diku tjetër, veçanërisht pasi 31-vjeçari ka luftuar për të qenë në maksimumin e vet.
Sidoqoftë, ka pasur shenja inkurajuese, pasi Mikel Arteta trashëgoi postin menaxherial nga Unai Emery. Trajneri i ri i Arsenalit i ka dhënë të tjera shkëndija Ozil. Turko-gjermani dihet se është një talent-fitues, por me Emery kishte mbetur në hije. Tashmë, me ndryshimet në stol, pak e nga pak po kthehet në figurë të rëndësishme tek Arsenali, edhe një herë. Kjo “klimë” ka të ngjarë të mbetet edhe në 18 muajt e ardhshëm, me zërat e transferimit që do të injorohen.
Ozil i tha “beIN Sports”, kur u pyet për të ardhmen e tij: "Jam shumë i kënaqur me kontratën time dhe do të vazhdoj këtu deri në fund të saj. Nuk mund t'ju them (parashikoj) se çfarë do të sjellë e ardhmja, por unë jam i lumtur tek Arsenali”. Tani për tani, Ozil është përqendruar të bëjë gjithçka mundet për të shpëtuar diçka nga sezoni 2019-2020. Vendi i katërt në Premier League, në fund të kampionatit, shihet si objektivi minimal. Po ashtu, “Topçinjtë” janë në ndjekje të trofeve të “Europa League” dhe “FA Cup”, për këtë edicion.