Një muaj më parë futbollistit të Partizanit nga Tirana, struganit Egzon Belica, bashkëshortja e tij Rona i solli në jetë fëmijën e parë, vajzën Hera.
Mbrojtësi 29-vjeçar deri tani nuk ka folur asnjëherë për ndjenjën e të qenurit prind, pas lindjes së vajzës.
Për herë të parë në një prononcim për gazetarin Reshat Ibrahimi, ai ka treguar se si ndihet si një prind i ri.
“Është diçka e mrekullueshme. Vetëm ata që janë bërë prindër e dinë. Është pozitiviteti i gjithë kësaj situate. Po rrimë mbrenda dhe i japim të gjithë vëmendjen e mundshme. Vajza po rritet. U bë një muaj që ende nuk kemi dal jashtë, pasi edhe këtu në Tiranë situata me koronavirusin është nën kontrollë” ka thënë Belica për gazetarin Reshat Ibrahimi.
Ai tregon edhe kuptimin e emrit të vajzës Hera.
“Hera është emër i lashtë Ilir, që në përkthim dmth mbretëreshë”, thotë Belica.
Bashkëshortja e Belicës, Rona, është vajza e Bekim Bautës, referit që para disa muajve ndërroi jetë.