Ish-presidenti i Barcelonës, Sandro Rosell, ka shpjeguar përse Lionel Messi e dëshiron me ngulm kthimin e Neymarit në Barcelonë, si dhe ka thënë se do ta transferonte përsëri yllin brazilian nëse ende do të ishte në krye të klubit.
Rosell ishte president i Barçës kur Neymari iu bashkua klubit katalonas në vitin 2013. Braziliani gëzoi sukses të madh në Camp Nou, duke e fituar tripletën dhe duke i regjistruar 105 gola në 186 ndeshje.
Më 2017, Neymar u bë lojtari më i shtrenjtë në botë duke e braktisur Barcelonën për t’iu bashkuar Paris Saint-Germainit për 222 milionë euro.
Por kohët e fundit është përfolur vazhdimisht se ai dëshiron të kthehet në La Liga, sepse nuk thuhet të jetë plotësisht i kënaqur me jetën në Francë.
Edhe pse Real Madridi e ka për synim të sjellë në klub 28-vjeçarin dhe PSG-ja ka vullnet ta shesë atë pikërisht në kryeqytetin spanjoll për t’i nxjerrë paratë që i harxhoi në të, kthimi i tij në Barçë mbetet mundësi e vërtetë.
Rosell thotë se nuk do të ngurronte aspak për ta kthyer brazilianin në klub, nëse do të ulej ende në karrigen kryesore në Camp Nou.
“Do ta bëja, padyshim”, tha Rosell i pyetur nga Mundo Deportivo nëse do ta transferonte Neymarin.
“Messi, i cili është lojtari më i mirë në histori të futbollit dhe shumë i mençur, dëshiron t’i ketë përkrah lojtarët e tjerë më të mirë në botë për të fituar gjithçka”, shtoi ai.
