Robin van Persie do të kthehet në Feyenoordi, ku ka shkëlqyer në rolin e sulmuesit në dy etapa të ndryshme të karrierës së tij. Në fakt, nuk bëhet fjalë për të qenë sërish protagonist në fushën e blertë, por në krah të trajnerit të mirënjohur, Dick Advocaat.
37-vjeçari e ka luajtur ndeshjen e fundit me Feyenoordin kundër ADO Den Haag në vitin 2019, para se të vendoste për të varur këpucët e gozhdë.
Roli i saktë i Van Persie në këtë klub nuk është konfirmuar ende, por 37-vjeçari është shprehur se do të ndihmojë stafin teknik.
“Ai nuk është një funksion zyrtar,” – tha Van Persie për faqen zyrtare të Feyenoord. Kjo është arsyeja pse e kam të vështirë ta përcaktoj saktësisht. Për shembull, nuk e shoh veten si trajner sulmuesish. Mendoj se është një situatë e favorshme për të zbuluar nëse më pëlqen kjo punë. Në fakt, do të merrja këtë punë sezonin e kaluar, por kjo nuk ndodhi. Dick (Advocaat) më telefonoi dhe më pyeti nëse doja të vija. Nuk mund t’I thosha jo.
Vitin e kaluar kam bërë vetëm gjëra që më pëlqejnë. Unë punoj si analist në Angli, udhëtoj shumë me familjen time dhe bëj shumë sporte. Tani do të shoh nëse kjo është diçka që mund ta shijoj".
