Paratici: Pirlo zgjedhje juventine

Futboll

Paratici: Pirlo zgjedhje juventine

Më: 9 gusht 2020 Në ora: 13:31
Paratici: Pirlo zgjedhje juventine

Vetëm disa orë pas eliminimit nga Liga e kampionëve, drejtuesit e Juventusit ndërhynë për të shkarkuar Maurizio Sarrin dhe në vendin e tij emëruan Andrea Pirlon, ish futbollist legjendar i bardhezinjve dhe Italisë.

Një zgjedhje e beftë dhe mbi të gjitha e guximshme kjo e drejtuesve të klubit bardhezi, pasi Pirlo nuk ka asnjë eksperiencë si trajner dhe do ta nisë këtë rrugëtim në pankinën e një skuadre si Juventus, që është mësuar me trofe në çdo sezon.

Megjithatë Drejtori Sportiv i bardhezinjve Fabio Paratici, në një deklaratë për mediat italiane, shpjegoi edhe arsyet që e çuan Juventusin t’i besojë pankinën një emri si Andrea Pirlo.

“Ishte një zgjedhje natyrale, një zgjedhje juventine. Pirlo është një djalë që ka qenë me ne, ka luajtur për ne dhe ka qenë vazhdimisht në kontakt me klubin. Menduam edhe se mund të jetë i predestinuar për t’u bërë trajner, ashtu siç ishte edhe si futbollist”, deklaroi Paratici.

Më pas drejtuesi i klubit bardhezi pranoi se ashtu si Pirlo, edhe Juventusi është futur në një “territor të paeksploruar”, ndërsa hodhi poshtë zërat për një kalim të mundshëm të tij te Roma e Friedkin.

“Shpresojmë që Pirlo të ketë të njëjtën rrugë si Zinedine Zidane, por këtë herë jemi të gjithë në një territor të paeksploruar, pasi vijmë pas 9 triumfesh radhazi në kampionat, diçka e pazakontë dhe nuk e dimë se si do të sillemi në sezonin e ardhshëm. Për të ardhmen time ka folur qartë presidenti Agnelli dhe nuk dua të shtoj asgjë përveç faktit që kam më tepër se 10 vite këtu e ndihem shumë mirë”, u shpreh drejtuesi torinez.

Shfaq komentet
comments powered by Disqus
Sot mund të lexoni Shfletoni kopertinat