Presidenti i Barcelonës, Josep Maria Bartomeu, ka thënë se thjesht nuk ka mundur ta lejojë Lionel Messin të largohet nga klubi, duke nënvizuar se argjentinasi është më i miri në botë dhe se ekipi ka nevojë për të.
Messi e tronditi botën e futbollit dhe Barcelonën kur e dorëzoi një shkresë largimi muajin e kaluar, por Barça refuzoi ta lejojë atë të largohet falas.
Kjo e detyroi Messin që përfundimisht të vendosë të qëndrojë në klub edhe këtë sezon, por e kritikoi Bartomeun se e theu fjalën e dhënë dhe nuk e lejoi atë të largohet siç i kishte premtuar.
Por Bartomeu – i cili është nën presion të madh – beson se nuk ka pasur zgjidhje tjetër pos ta mbajë kapitenin, për të cilin beson se do ta bëjë dallimin edhe për ekipin e Ronald Koeman këtë sezon.
“Nuk dua të futem në konflikt me të. Ai është kapiteni jonë dhe lideri i ekipit tonë”, tha Bartomeu për Messin në një intervistë për TV3.
“Nuk kam mundur ta lë të largohet nga klubi. Ai është lojtari më i mirë i të gjitha kohëve dhe ekipi ka nevojë për të. Ta kesh Messin suksesin e ke të garantuar”, nënvizoi ai.
“Ne duhet ta urojmë veten që e bëmë Messin të qëndrojë me ne dhe për mënyrën sesi është sjellë ai ditëve të fundit. Lojtari më i mirë në botë duhet të qëndrojë në shtëpi”, shtoi ai.
