Drejtori sportiv i Interit, Piero Ausilio, ka konfirmuar se janë kontaktuar nga Tottenham për qendërmbrojtësin Milan Skriniar, por këmbëngul se sllovaku i shumëkërkuar nuk është në merkato
. “Po e përsëris; kishim kontakte me Tottenham, por ua bëmë të ditur sërish anglezëve se ai nuk është në shitje. Gjithashtu, nuk kemi marrë ndonjë ofertë special për të”.
Drejtori sportiv zikaltër u ndal edhe te Radja Nainggolan, për të cilin tha se bisedimet me Cagliari janë ende në vazhdim. Synohet shitja e tij e përhershme, jo një tjetër huazim. “Nuk kemi bërë asnjë hap përpara. Ne e dimë që Cagliari, drejtpërdrejt dhe indirekt, ka konfirmuar se e do Radja. Ai është ende me Interin, ka një kontratë 2-vjeçare.
Ne do të flasim për këtë dhe do të shohim se çfarë të bëjmë. Nëse qëndron, ai do të jetë pjesë integrale e projektit për një Inter të fortë dhe konkurrues. Përndryshe do të takojmë Cagliari dhe do të tentojmë një zgjidhje që funksionon për të gjithë”.
