Samuel Eto’o e ka kritikuar ashpër revistën franceze, France Football, e cila e cilësoi ish-sulmuesin e Kamerunit si anësor në nominimin për Ekipin e Ëndrrave të Topit të Artë.
Eto’o ka pasur një karrierë legjendare në ekipe si Inter, Barcelona, Chelsea dhe Mallorca.
Ai ka fituar tri La Liga dhe dy Liga të Kampionëve bashkë me ekipin blaugranas para se t’i bashkohej Interit me të cilin e fitoi edhe një tjetër Ligë të Kampionëve.
Në total, Eto’o i ka shënuar 371 gola në 764 ndeshje, gjithashtu ka qenë pjese e ekipit të vitit nga UEFA në vitin 2005 dhe 2006.
Sidoqoftë, Eto’o të gjitha këto i ka fituar duke luajtur si sulmues qendror.
Si rezultat i kësaj, 39-vjeçari ndien se France Football nuk e ka respektuar duke e vlerësuar si sulmues të krahut të djathtë.
“Faleminderit, por unë kam luajtur 1-2 sezone në krahun e djathtë (ndërsa kam 25 vjet karrierë duke luajtur në qendër),” shkroi Eto’o në Twitter.
“Mungesë respekti nga France Football, sidoqoftë!”
