Mesfushori i Madridit, Luka Modric, ka rezultuar negativ në testin për COVID-19, pas testimit pozitiv të shokut të tij te Kombëtarja e Kroacisë, Domagoj Vida.
Kishte shumë frikë në kryeqytetin spanjoll se Modric do të përfundonte i testuar pozitiv, pasi kishte bërë një fotografi me mbrojtësin Vida një ditë para ndeshjes së Kroacisë kundër Turqisë të mërkurën mbrëma.
Mbrojtësi përfundoi duke luajtur pjesën e parë para se të informohej se ai ka rezultuar pozitiv, ndërsa u zëvendësua mes pjesëve.
Testet e bëra nga skuadra e Kroacisë zbuluan se mesfushori i Interit, Marcelo Brozovic dhe një anëtar i ekipit stërvitor gjithashtu po mbartin virusin.
Kroacia do të ndeshet me Suedinë të shtunën në mbrëmje në Ligën e Kombeve.
“Pas një testi pozitiv të coronavirusit nga anëtari i ekipit kombëtar Domagoj Vida të mërkurën në Stamboll, ekipi kombëtar kroat kreu teste shtesë përpara ndeshjes kundër Suedisë të shtunën”.
“Rezultatet e testit treguan dy gjetje pozitive, një nga anëtari i ekipit kombëtar Marcel Brozovic dhe një nga një anëtar i stafit të ekipit kombëtar, i cili ndoshta është një gjetje pozitive për shkak të infeksionit paraprak”.
“Të dy u izoluan menjëherë nga anëtarët e tjerë të ekipit kombëtar”, thuhet në njoftimin e federatës kroate të futbollit.
Tre lojtarë të Real Madridit në izolim
Për fat të mirë për Real Madridin, testi negativ i Modric do të thotë se ai nuk do të duhet të ndjekë gjurmët e tre lojtarëve të infektuar.
Te Reali, Eden Hazard, Casemiro dhe Eder Militao, kanë qenë të gjithë në izolim pasi ishin pozitivë për COVID-19.
