Lewandowski është shpallur Futbollisti i Vitit i Gjermanisë

Futboll

Lewandowski është shpallur Futbollisti i Vitit i Gjermanisë

Më: 25 korrik 2021 Në ora: 17:21
Lewandowski është shpallur “Futbollisti i Vitit i Gjermanisë”

Robert Lewandowski është shpallur “Futbollisti i Vitit i Gjermanisë” për sezonin e dytë radhazi, përpara Thomas Muller dhe Erling Haaland. Polaku e fitoi çmimin për herë të parë në sezonin 2019-2020, pasi inspiroi marshimin e Bayernit drejt tripletës. 32-vjeçari ishte në gjendje të mbante të njëjtat standarde të larta edhe në sezonin e fundit në “Allianz Arena”.

Kontributi i tij i jashtëzakonshëm siguroi që Bayerni të fitojë titullin e Bundesligës për vitin e nëntë radhazi. Gjithashtu, ai arriti të thyejë rekordin e Gerd Muller, duke shënuar 41 gola në një kampionat (karshi 40 golave të legjendës gjermane).

Lewandowski mori 315 vota përpara shokut të ekipit, në vendin e dytë, Muller; dhe 318 vota përpara “hajmalisë” së Borussia Dortmund, Haaland, për të fituar çmimin kryesor individual në Gjermani këtë vit. Polaku shprehu kënaqësinë e tij: “Unë e di se sa i madh është ky nder. Për mua është një arsye për shumë krenari dhe gëzim, sepse rrallë fitohet titulli i” Futbollistit të Vitit” dy herë me radhë në Gjermani”.

Lewandowski shënoi 48 gola në 48 ndeshje, në të gjitha garat, për Bayern Munich gjatë sezonit të kaluar, duke përfshirë 41 gola në Bundesliga. “Sigurisht që jam i lumtur që shënova 41 gola në 29 ndeshje të Bundesligës. Ky numër golash më mbush me shumë krenari dhe sigurisht që është një paraqitje spektakolare në funksion të karrierës sime”, – shtoi sulmuesi 32-vjeçar.

Çmimi për trajnerin e vitit të Gjermanisë (2020-2021) u dha gjithashtu këtë fundjavë, me Thomas Tuchel triumfues para Hansi Flick dhe Edin Terzic. Ish-trajneri i Borussia Dortmund udhëhoqi blutë e Londrës drejt fitimit të Champions League, pasi zëvendësoi Frank Lampard në stolin e nxehtë të “Stamford Bridge në janar”.

“E pranoj çmimin me shumë mirënjohje si një nder të madh për të gjithë ekipin, sepse e shoh veten si një lojtar ekipi”, – tha Tuchel pasi mori vlerësimin në gjermani. Ky çmim organizohet nga “Kicker”, me votat e gazetarëve sportivë gjermanë.

commentFirst article
Sot mund të lexoni Shfletoni kopertinat