Duke përcjellë atmosferën e përgjithshme në të dy kampet para përballjes së sotme mes tyre në Ligën B të Kombeve, mediat skoceze shkruajnë se “trajneri i Maqedonisë, Goce Sedlloski, është nën presion për të dhënë dorëheqjen nga tifozët maqedonas, por edhe nga persona të futbollit në vend”.
E përditshmja skoceze “Daily Record”, e cila ndodhet me ekipin e saj në Shkup, raporton se Sedlloski nuk ka fituar dhe nuk ka shënuar asnjë gol që prej emërimit të tij si trajner i Maqedonisë, gjë që ka shkaktuar pakënaqësi te një pjesë e njerëzve të futbollit në vend.
“Dorëheqjen e Sedlloskit e ka kërkuar edhe ish-reprezentuesi i Maqedonisë, Igor Gjuzelov, i cili thotë se trajneri po e ka të vështirë të gjejë zgjidhjen për përfaqësuesen. E gjithë kjo krijon presion mbi kombëtaren, e cila kërkon fitoren në Shkup”, shkruan “Daily Record”.
Por një prej mediave më me ndikim në Skoci raporton se në një situatë të ngjashme ndodhet edhe trajneri i tyre, Sebastien Pocognoli, i cili gjithashtu ka pasur një fillim të dobët në Ligën e Kombeve që kur mori drejtimin e Skocisë në gusht.
“Fillimi ishte i vështirë për Sebastien Pocognolin si trajner i Skocisë dhe, nëse kombëtarja nuk shënon gol në 25 minutat e para të ndeshjes së Ligës së Kombeve në Shkup, kjo do të sjellë një rekord të pafavorshëm për përfaqësuesen, periudhën më të gjatë pa shënuar gol në 154 vitet e fundit”, shkruan “Daily Record”.
Skocia nuk ka shënuar gol për plot 432 minuta, ndërsa golin e fundit e ka shënuar kundër Haitit në Kupën e Botës 2026, në minutën e 28-të të ndeshjes.
Maqedonia, nga ana tjetër, tashmë e ka thyer rekordin e saj për serinë pa shënuar gol, me 607 minuta. Goli i fundit i përfaqësueses është ai i Bojan Miovskit, në humbjen bindëse 7:1 në udhëtim ndaj Uellsit, në minutën e 23-të të ndeshjes.
