Kampioni i Kosovës, Drita nga Gjilani, shënon fitore historike në garat parakualifikuese në Champions League, duke u kualifikuar më tej. Drita tregoi lojë të madhe dhe pas 120 minutave e mundi me rezultat 2:0 skuadrën nga Andorra, Santa Coloma, në ndeshjen që u luajt në stadiumin në Gjibraltar. Ndeshja në kohën e rregullt përfundoi baras (0:0), por pas vazhdimeve dy herë nga 15 minuta, Drita u dëshmuan shumë e fortë dhe ngadhënjeu duke iu falënderuar eurogolit të Xhevdet Shabanit në minutën e 99-të dhe Fidan Gërbeshit nga penalltia në atë të 108-tën. Kjo është fitorja e parë për një ekip të Kosovës në garat kualifikuese evropiane dhe një sukses jashtëzakonshëm, sepse vitin e kaluar Trepça ’89 ishte eliminuar me humbjet (2:1 në Vikingur e 4:1 në Mitrovicë) nga Vikingur i Ishujve Faroe, në kuadër të Champions League dhe Prishtina (me 5:0 në Norrkoping e 1:0 në Mitrovicë) nga Norrkoping i Suedisë, në Europa League. Drita që drejtohet nga kryetrajneri Bekim Isufi bëri sensacion me këtë kualifikim dhe njëherësh treguan se me plotë meritë janë në këtë ngjarje të madhe.
Santa Coloma-Drita 0:2
Gjyqtar: P. McLaughlin P. (Irlanda).
Shënues: Xh. Shabani (99’), Gërbeshi (108’-nga penalltia).
Kartonat e verdhë: San Nicolas, Torres, Lima, Rebes, Noguerol - B. Shabani, Kuka, Limani, Haliti.
Santa Coloma: Casals, San Nicolas, Lima, Ramos, Cistero (Noguerol 83’), Perez, Rebes, Rodriguez (Mercade 86’), Torres, Riera (Sanchez 62’), Buron (Faure 106’).
