Edhe pse dritat e “Casa Milan” kanë qenë të ndezura deri në orën 03:00 pas mesnate, lajmi për transferimin e Gonzalo Higuain nga Juventusi te Milani nuk ka ardhur. Madje ky transferim, ashtu sikurse edhe shkëmbimi Bonucci-Caldara ka pësuar një stop të papritur. “A u arrit marrëveshja? Ende jo”, kanë qenë fjalët e Beppe Marotta, drejtorit sportiv të klubit bardhezi, që është larguar i zhgënjyer nga takimi me kolegët milanistë, duke mos gjetur ende një marrëveshje edhe pse ajo dukej e përfunduar.
Duket se pengesë për transferimin e sulmuesit argjentinas te Milani është vetë lojtari, që nuk pranon idenë që të luajë në formë huazimi, por të shitet. Përveç kësaj, Higuain kërkon 9 milionë euro në sezon. Shumë pretendime, që mund të përmbysin situatën dhe kjo marrëveshje të mos realizohet, pasi në skenë ka dalë sërish Chelsea dhe trajneri Sarri, që e kërkojnë me ngulm Higuain, që është gati të shkojë në Londër dhe të luajë në Champions (kjo do të realizohet në rast se ikën Olivier Giroud te Marseja).