Flamurtari i Prishtinës vazhdon me fitore të njëpasnjëshme në elitën e futbollit të Kosovës. Kuqezinjtë regjistruan fitoren e tretë rresht, kësaj radhe e mundën me rezultat minimal 1:0 KEK-un nga Kastrioti, në ndeshjen që u zhvillua në stadiumin e Flamurtarit. Në minutën e 81-të, Agron Bruqi vulosi fitoren e madhe të ‘flamurtarëve’ dhe njëherësh janë lider i Superligës.
Kryetrajneri Arsim Thaçi ka një mijë e një arsye që të jetë sikurse në qiellin e shtatë sepse pak kush e kishte pritur se në tri ndeshjet e para do të arrijnë po aq fitore, për faktin se në hapje e mundi me 1:0 Ferizajn, pastaj në Gjilan poshtëoi me 3:1 kampionin në fuqi Dritën dhe së fundi e mposhti me 1:0 KEK-un. Flamurtari është në formë të mirë dhe tani ka sërish ndeshjen si vendas, me skuadrën me renome Lirinë nga Prizreni. Është një rast i mirë për kuqezinjtë që të vazhdojnë me fitore të njëpasnjëshme.
