Mediat greke zbulojnë një çështje tjetër në kombëtaren tonë kuqezi, në prag të grumbullimit për dy ndeshjet e nëntorit. Në qendër të moskuptimeve mes palëve është kapiteni ynë kuqezi, Mërgim Mavraj, i cili luan në kampionatin grek me Aris të Selanikut.
“Federata Shqiptare e Futbollit po bllokon pjesëmarrjen e Mërgim Mavrajt në ndeshjen ndaj Apollon Smirnis, të hënën, në “Rizoupoli”. Me letrën e tyre, dërguar për klubin selanikas, shqiptarët po kërkojnë që Mavraj të mos lejohet të marrë pjesë në këtë ndeshje, sepse ekipi kombëtar shqiptar do të nisë grumbullimin këtë ditë, për sfidën e fundjavës së ardhshme me Skocinë.
Vetë Mavraj dëshiron të luajë dhe ta ndihmojë klubin e tij, por nëse e bën këtë, atëherë do të ndëshkohet nga Federata Shqiptare e Futbollit. Përkundrazi, nuk ka dyshime për Migjen Bashën, i cili është i pezulluar për ndeshjen me Skocinë dhe do të vihet në dispozicion të kombëtares shqiptare për miqësoren pas saj”, – shkruan “makthes.gr”.
Ndërkohë, mësohet se vetë Mavraj ka komunikuar me trajnerin Christian Panucci për këtë situatë, duke i kërkuar atij të lejohet që të luajë të hënën për klubin dhe pastaj t’i bashkohet direkt grumbullimit të kuqezinjve. Por, Panucci ka qenë i prerë, duke i thënë kapitenit se nuk bën asnjë përjashtim, të gjithë janë të barabartë dhe duhet të vijnë në kombëtare sipas rregullave të tij dhe atyre ndërkombëtare, në kësi rastesh.
Precedenti i vendosur nga trajneri kuqezi me Sokol Cikalleshin, në fillim të punës së tij, duket se është vijë-sjellje e padiskutueshme e italianit me të gjithë lojtarët e kombëtares. Sepse, sikurse duhet të jetë në të vërtetë, kombëtarja është mbi të gjitha, nuk është thjesht një vend pune…, ku mund të paraqitesh sipas qejfit dhe oreksit.