Ylli belg i Chelseat, Eden Hazard, ka thënë se trupi i tij ka filluar ta ndiejë lodhjen pas trajtimit të keq që e merr gjatë ndeshjeve nga kundërshtarët, dhe për këtë arsye ka thënë se për të do të ishte më e mirë nëse do të mbrohej nga gjyqtarët.
27-vjeçari kishte mbetur i lënduar pas ndeshjes kundër Manchester Unitedit në Stamford Bridge, me një lëndim në shpinë, pasi lojtarët e “Djajve të kuq” kishin bërë ndërhyrje të vazhdueshme në të për ta ndaluar.
Dhe për shkak të këtyre ndërhyrjeve, belgu, i cili ka arritur t’i shënojë shtatë gola dhe t’i bëjë katër asiste në vetëm dhjetë ndeshje të këtij sezoni të Premierligës, ka thënë se ai ka filluar të ndiejë ndikimin e këtyre ndërhyrjeve në trupin e tij.
“Unë jam duke e ndierë ndikimin, kam qenë duke luajtur si futbollist profesionist për më shumë se dhjetë vite tani. Jam 27-vjeçar dhe teksa po bëhem më vjetër, duhet të kujdesem më shumë për trupin tim”, ka thënë Hazard.
“Kam bërë ‘yoga’ qysh kur kam ardhur në Chelsea. Nuk jam i lumtur për këtë gjë, që sulmohem nga kundërshtarët, por është pjesë e futbollit. Gjyqtari tenton ta bëjë punën e tij dhe unë e bëj timen”.
“Për mua, do të ishte më mirë nëse do të më mbronin më shumë gjyqtarët, por e kuptoj se për ta është e vështirë ta ndëshkojnë dikë me karton të verdhë qysh në fillim. Në çdo vend është e njëjta gjë për mua. Ne kemi mjekë të fizioterapisë në klub, kështu që unë thjesht marr më shumë trajtime”.