Ademi: President e arritëm atë që e nise dhe që e synove

Futboll

Ademi: President e arritëm atë që e nise dhe që e synove

Më: 21 nëntor 2018 Në ora: 10:59
Ademi: President e arritëm atë që e nise dhe që e synove

E arritëm suksesin e parë dhe me plotë të drejtë po e quajmë HISTORIK, sepse i tillë edhe është. Një rrugë e nisur qysh moti nga legjenda dhe ish-presidenti ynë, FADIL VOKRRI. Ai i vuri themelet e këtij suksesi dhe sonte ne të gjithë së bashku, me futbollistët tanë të mrekullueshëm, me stafin teknik dhe me tifozët “Dardanët” e finalizuam dëshirën e tij. Prandaj, jam më i lehtësuar se kurrë më parë, ngase nga këtu i drejtohem në qiell: ‘President e arritëm atë që e nise dhe që e synove’.

Do të kisha dashur që të jem përkrah LEGJENDËS dhe t’i gëzoheshim së bashku këtij suksesi, ashtu siç iu gëzuam vazhdimisht për vite të tëra sukseseve të njëpasnjëshme deri në anëtarësimin në UEFA e FIFA, por jeta është e tillë dhe për këtë arsye sonte në këta lot gëzimi kemi edhe lot dhimbjeje.

Rrugëtimi ynë ka qenë i gjatë, me shumë sakrifica e vështirësi, por tashmë kemi arritur në një nivel tjetër – në arritjen e sukseseve në fushën e gjelbër. Spektakli që dhuruan djemtë tanë në fushën e gjelbër dhe tifozët në tribuna ishte për mbamendje e për lakmi. E arritëm synimin tonë të parë, por jo të vetmin, ngase qysh tash fillojmë të mendojmë për sukseset e radhës, ngase ëndrra dhe objektivi ynë është kualifikimi në Kampionatin Evropian 2020. Sidoqoftë, sonte është koha për festë, kurse objektivat e tjerë jam i bindur se do t’i realizojmë kur t’ju vije radha.

Gjithsesi, ky sukses dëshmon rritjen e jashtëzakonshme që ka bërë Kombëtarja e Kosovës, e vetvetiu vjen duke u rritur edhe niveli i futbollit në Kosovë, gjë e cila po dëshmohet me daljen në skenë të talenteve të shumta në ekipet tona kombëtare të grupmoshave pikërisht nga kampionati vendor.

Prandaj, sonte në këtë natë festive edhe një herë dua që në emrin tim dhe të KE të FFK-së, t’i përgëzoj dhe t’i falënderoj futbollistët që me paraqitjen e tyre të shkëlqyeshme na i rritën zemrat dhe e bënë krenar tërë kombin shqiptar. Uroj dhe falënderoj shtabin teknik, ekipin organizativ të FFK-së së bashku me Policinë dhe kompaninë e sigurimit “Besa Security” dhe menaxhmentin e stadiumit për një organizim perfekt, tifozët “Dardanët” që si përherë dhurojnë spektakël në tribuna, pastaj institucionet shtetërore që vazhdimisht po na qëndrojnë përkrah në realizimin e objektivave, partnerët tanë IPKO, TEB, Fourteen, Emerald, Vas tours, Digitalb, Ujin e Alpeve, kompaninë “Alt4c”, e cila për herë të parë realizoi me sukses në tërësi shitjen e biletave online, si dhe të gjithë qytetarët që ishin të pranishëm në stadium, por edhe ata që për shkak të kapacitetit të vogël të stadiumit u detyruan që emocionet e kësaj ndeshje t’i përcjellin nëpërmjet transmetimit televiziv, si dhe të gjithë të tjerët që janë përreth nesh në këtë rrugëtim të suksesshëm, me shpresën dhe bindjen se së bashku do të festojmë edhe shumë arritje tjera.

Urime dhe na priftë e mbara në rrugëtimet e tjera, shkruan Agim Ademi, president i Federatës së Futbollit Kosovës.

Sot mund të lexoni Shfletoni kopertinat