Hysaj në udhëkryq - Bota Sot
Hysaj në udhëkryq

Futboll

Hysaj në udhëkryq

Më: 27 nëntor 2018 Në ora: 13:05
Hysaj në udhëkryq

E ardhmja e Elseid Hysajt në udhëkryq. Mbrojtësi shqiptar ende nuk e ka të qartë nëse do të jetë pjesë e Napolit sezonin e ardhshëm, edhe pse ka kontratë me këtë klub deri në vitin 2021. Është pikërisht kontrata motivi kryesor që shton dyshimet për ta ardhmen e tij.

24-vjeçari, i cili u ble nga Empoli në vitin 2015 për 5 milionë euro, ende nuk ka gjetur gjuhën e përbashkët me drejtuesit napolitanë për rinovimin e kontratës.

Bisedimet, që nisën që në pranverë, kanë arritur në një pikë delikate, pas zhvillimeve të vrullshme të muajve të fundit.

Përfaqësuesit e mbrojtësit shkodran kërkojnë më ngulm një kontratë afatgjatë me pagë të dyfishuar, që shkon nga 1.6 në 3 milionë euro neto në sezon si dhe eliminimin e klauzolës 50 milionë euro e vlefshme për jashtë Italisë, kërkesa këto që konsiderohet të ekzagjeruara.

Ka ende kohë për të shtrënguar duart, po jo në pafundësi. Hysaj shpreson që gjithçka të mbyllet brenda dhjetorit, maksimumi në fillim të vitit të ardhshëm. Nëse nuk merr një përgjigje, atëherë do të shohë mundësinë e largimit nga Napoli.

Chelsea, ku drejton mentori i tij, Maurizio Sarri, e ka kërkuar edhe verën e kaluar dhe tani është gati të rinisë bisedimet për ta mbyllur një herë e mirë këtë çështje.

Presidenti De Laurentiis, për momentin, nuk dëshiron të privohet nga Hysaj, por nuk përjashtohet mundësia që të ndryshojë mendje. Shpërthimi i Malcuit dhe mundësia për të fituar para janë dy argumente të vlefshme, që u shtohet edhe interesimi për Darmian. Prioritet mbetet arritja e marrëveshjes me Hysajn, por gjithsesi, plani B është gati.

Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...