Gennaro Gattuso ka fajësuar lojtarët e Milanit për eliminimin e hershëm nga Liga e Evropës.
Milan janë eliminuar nga Liga e Evropës në fazën e grupeve, pas humbjes 3:1 në udhëtim te Olympiacos.
‘Rossonerët’ kalonin tutje edhe me humbje me një gol diferencë, por humbja 3:1 ishte fatale për ata.
Kjo është hera e parë që Milan nuk arrin të kaloi fazën e grupeve në një garë evropiane që nga viti 1999/2000.
“Ka shumë zhgënjim. Ne së pari nuk duhet t’i harrojmë miliona tifozë të Milanit”, ka deklaruar Gattuso.
“Ne e kishim lojën në dorë, por kur krijoni tetë mundësi shënimi në një stadium si ky, dhe filloni të bini në momentin e parë të vështirë, atëherë eliminimi është i merituar”.
“Me disa gabime që bëmë, ne nuk e merituam të shkojmë tutje. Ne e dhuruam lojën”.
“Ne e dhuruam lojën, nuk ka justifikime, dhe duhet të marrim përgjegjësi për këtë”, ka vazhduar Gattuso, i cili është parë shumë i nervozuar pas ndeshjes.