Qysh prej Rilindjes sonë Kombëtare në formimin e kombit tonë fetë kanë kontribuar me bashkimin e njerëzve me angazhimin e tyre për bashkësinë, u tha sot me rastin e shënimit të Ditës së teqes bektashiane në Gjakovë.
Në këtë ditë të veçantë për bektashinjtë e Gjakovës ishte edhe kandidati për kryeministër nga Vetëvendosje Albin Kurti.
Në fjalët përshëndetëse nga përfaqësues të klerit dhe tarikateve të ndryshme u tha se janë këtu për të nderuar ditën e themelimit të teqesë së Gjakovës, por edhe për të kujtuar ata që shërbyen ndër vite këtu.
Në emër të kryegjyshatës botërore të bektashinjve, Shenjtëria e Tij, Kryegjyshi Botëror i Bektashinjve, Haxhi Dedë Edmond Brahimaj, tha se bektashinjtë shquhen për sakrificë e tolerancë.
Brahimaj: U bë ç’është e mundur në ndërtimin e vetëdijes së çdo besimtari
“Dervishët dhe baballarët e teqesë në marrëdhënie të ngushta dhe me bektashianeje në Prizren bën ç’është e mundur në ndërtimin e vetëdijes së çdo besimtari në Lëvizjen shqiptare”, ka thënë Brahimaj.
Don Lush Gjergji nga Ipeshkvia e Kosovës, tha se ky përvjetor paraqet një mundësi për të ndriçuar të kaluarën tonë dhe të përcaktohemi për të ardhmen tonë.
Gjergji: Të gjithë jemi vëllezër shqiptarë
“Ky përvjetor sado i vogël dhjetëvjeçar na jep mundësinë që të ndriçojmë të kaluarën tonë. Të vetëdijesohemi për të tashmen tonë dhe të përcaktohemi për të ardhmen tonë në stilin e vëllazërisë gjithë shqiptare të besimit të madhit Zot”, tha Gjergji.
Ndërsa njeriu më i votuar në Kosovë, kandidati për kryeministër nga Lëvizja Vetëvendosje Albin Kurti u shpreh se të nderosh patriotët do të thotë të nderosh vendin dhe paraardhësit.
Kurti: Njerëzit janë të lirë kur janë bashkë
“Qysh prej Rilindjes sonë Kombëtare në formimin e kombit tonë fetë kanë kontribuar me bashkimin e njerëzve me angazhimin e tyre për bashkësinë. Gjendja e tyre njerëzve është bashkësia. Kur njerëzit janë të ndarë ose të përçarë ose të vetmuar kjo do të thotë se dikush prej lartë i ka ndarë i ka përçarë ose i ka izoluar , për ti sunduar më kollaj. Njerëzit janë të lirë atëherë kur janë bashkë. Këtë gjë kombi ynë prej fillimit e ka dëshmuar si askush tjetër”, tha Kurti.
Për historikun e bektashizmit foli Baba Mumin Lama nga Gjyshata Bektashiane e Kosovës. Ai tha se në bektashizëm mund të merret një kulturë e gjerë e të përsosur në shkencat fetare.
Lama: Bektashinjtë respektojnë islamin
“Në bektashizëm bazë është Kurani dhe fjalët e profetit Muhamed. Bektashinjtë adhurojnë dhe respektojnë të gjitha urdhëresat dhe udhëzimet që i përmbana islami. I falen Zotit të madh duke e njohur si krijues të çdo gjëje dhe duke e njohur si pushtetin e plote fuqishëm”, tha Lama.
Baba Mumini foli edhe për figurën e të madhit Baba Qazim Bakalli.
Një kumtesë për figurën e patriotit Qazim Bakalli kishte përgatitur Tahir Bakalli të cilën e lexoi Agim Jaka.
Ndryshe, bektashizmi është ndërtuar mbi themelet e fesë islame. Qëllimi i bektashizmit është një botë e harmonisë midis njerëzve, që do të jetojnë së bashku të bashkuar, si qytetar të një bote të dashurisë së vërtetë dhe prosperitetit të përbashkët nën Zotin.
