Lobi Euro-Atlantik Shqiptar, e mirëpret dhe përshëndetë, kundërshtimin që Bundestagu i Gjermanisë i dha edhe zyrtarisht, projektit të dëmshëm kombëtar të “korrigjimit të kufirit” në mes të Republikës së Kosovës dhe Serbisë.
Me këtë rast, Lobi Euro-Atlantik Shqiptar, i shpreh mirënjohjen e thellë, Kancelares Merkel dhe deputetëve të Bundestagut, sidomos partive të qendrës që janë në koalicionin qeverisës, si dhe Partisë Liberale dhe të Gjelbër, të cilët e kanë kuptuar drejtë zgjidhjen e çështjes së njohjes reciproke në mes të Kosovës dhe Serbisë, e cila duhet realizuar konform parimeve e standardeve euro-atlantike dhe jo me mendësinë e së kaluarës, e cila i ka sjellë shumë luftëra dhe dëme popullit shqiptar.
Lobi Euro-Atlantik Shqiptar, e mirëpret angazhimin e shtetit Gjerman, në fazën përfundimtare të dialogut, që do të shpie në njohje reciproke. Me këtë rast e falënderojmë shtetin mik gjerman për kontributin e vazhdueshëm në çlirimin, ndërtimin dhe integrimin e shtetit të pavarur të Kosovës. E në këtë kontekst edhe vendimin e djeshëm që miratoi stacionimin e 400 ushtarëve gjermanë si pjesë e KFOR-it në Kosovë.
Shukri Ymeri
Kryetar i Lobit Euro-Atlantik Shqiptar
Lörrach, Gjermani