Haziri tregon për situatën me Koronavirus në Gjilan - Bota Sot
Haziri tregon për situatën me Koronavirus në Gjilan

Gjilani

Haziri tregon për situatën me Koronavirus në Gjilan

Më: 16 maj 2020 Në ora: 17:52
 Kryetari i Komunës së Gjilanit, Lutfi Haziri

 Kryetari i Komunës së Gjilanit, Lutfi Haziri, ka thënë se deri tani në këtë qytet janë shëruar 49 persona që ishin të prekur me Covid-19.

Ai shpreson që nga mbrëmë është mbyllur cikli i burimit të katërt të infeksionit, i cili ka rezultuar në total me 24 të infektuar dhe që si burim ishte klinika private në Prishtinë me të cilën dy qytetare të Gjilanit janë infektuar që në ditën e parë, një lehonë e cila lindi një djalë të shëndoshë dhe një infermiere e cila punon në atë klinikë.

“Lajm i mirë për Gjilanin është se në dy ditët e fundit kemi shkuar në mbylljen e kontakteve dhe sot do të vazhdohet me 15 teste të reja të kontakteve dhe presim kontaktet e institutit për të parë numrin e përgjithshëm të të infektuarve nga 67 sa janë në komunën e Gjilanit”, ka thënë Lutfi Haziri, kryetar i Gjilanit.

Ai theksoi se 49 të infektuarit janë shëruar tërësisht, janë integruar në jetën e përditshme dhe nuk kanë asnjë lloj problemi dhe ata llogariten si të imunizuar e të shëruar plotësisht dhe dy raste të tjera për pasojë edhe të sëmundjeve të tjera fatkeqësisht kanë ndërruar jetë.

Në njoftimin e Komunës thuhet se Haziri ka deklaruar se kanë ndërmarrë edhe veprimet për hapin e pakos së dytë të hapjes së masave ekonomike në komunën e Gjilanit sipas vendimit të qeverisë së Republikës, duke shtuar se Komuna e Gjilanit është përgatitur dhe përmes sektorëve të saj të ekonomisë dhe të inspeksionit të shërbimeve publike e të shërbimeve të tjera siç janë Stacioni i Autobusëve dhe Tregu i Gjelbër do të marr veprime konkrete që nga e hëna ta normalizojë aktivitetin e këtyre shërbimeve.

“Tregu i Gjelbër në Gjilan është në punim e sipër dhe nuk hapet, por tregjet mobile sipas planeve do të trajtohen dhe do të kërkohet leje nga organet qendrore për organizimin e këtyre shërbimeve. Qytetarëve u është rritur e drejta e daljes dy herë në ditën nga 120 minuta dhe kjo duhet të shfrytëzohet sipas numrit të parafundit të letërnjoftimit për aktivitete të domosdoshme e jo për aktivitete të tjera, takime sociale, rekreacion në mënyrë që të mos lejojmë që të bartet virusi i mundshëm, ngase ai edhe më tej po sjell problem”.

Shtatë lojtarët e Gjilanit që janë vendosur në masa karantinimi, po kërkohet që të kthehen në Gjilan dhe një gjë të tillë e ka kërkuar kreu i komunës, Lutfi Haziri, që ka thënë se ata do të vendosen në karantinën e klubit. Haziri beson se gjatë ditës së sotme do të gjendet zgjidhja.

“Nuk ka logjikë që lojtarët do të vendosen në karantinë sportive sipas rregullave të UEFA-s për fillimin e kampionatit, që janë të ashpra të mbahen në qendra kolektive të karantinimit dhe t’i krijojnë probleme sektorit të madh të sportit, i cili po pritet të normalizohet gjatë kësaj faze menaxhimit të pandemisë”, ka thënë Haziri.

Shfaq komentet
comments powered by Disqus
Sot mund të lexoni Shfletoni kopertinat