Blend Spahiu, ka dëshmuar në Gjykatën Themelore të Gjilanit sesi i është vrarë babai Lulzim Spahiu nga polici me 29 dhjetor 2019.
Ai tregoi se se ditën kritike është nisur me babin e tij në drejtim të fshatit Llabjan, dhe atë me qëllim të shitjes së kafshëve në treg.
“Me të arritur tek ‘Gllama’ në rrugën qarkore në Gjilan, meqë rruga ka qenë e rrëshqitshme, babai im e ka ngadalësuar shpejtësinë e lëvizjes së kamionit dhe para nesh ka qenë një veturë e ndalur”, pohoi dëshmitari.
Tutje dëshmitari thotë se “babai i tij paraprakisht ka dhënë shenjë për tejkalimin e veturës, mirëpo vetura ka dalë para kamionit dhe e njëjta nuk kishte dhënë shenjë për t’u kthyer me çka ne e kemi goditur në derën e përparme të automjetit, edhe atë mes derës së shoferit.
Në atë moment, kur kamioni është ndalur dhe ne kemi dalë të shohim se çfarë ka ndodhur, nga makina ka dalë edhe i akuzuari i cili ka filluar të ofendojë dhe fyej.
Ai ka nxjerrë revolen nga brezi dhe e ka drejtuar tek unë, por një grua që ishte në makinë me të e ka ndalur atë”, ka thënë ai.
Blendi po ashtu thekson se babai i tij ka hipur në kamion, ndërsa ky ka dalë mbapa kamionit, me çka ka parë tërë ngjarjen.
Sipas Blendit, i akuzuari Vllaznim Hamdija është afruar në drejtim të kamionit dhe i njëjti ka shtënë me armë zjarri në drejtim të babait të tij duke i dhënë një plumb në pjesën e pasme të kokës.
Më pas, ai thotë se e ka thirrur në telefon xhaxhain e tij Blerim Spahiun, të cilit i ka rrëfyer gjithë ngjarjen.Në pyetjet e mbrojtësit të të akuzuarit Vllaznim Hamdija, avokatit Ymer Huruglica, dëshmitari thotë se pas aksidentit të bërë në vendin e ngjarjes, ky ka qenë i pari që ka dalë për të parë se ç ‘kishte ndodhur, e më pas, pas tij ka dalur edhe babai i tij, kurse nga makina tjetër bashkë me të akuzuarin kanë dalur edhe dy pasagjerë të tjerë.
“Kur kam dalë nga kamioni, nuk kam pasur gjë në dorë”, thotë dëshmitari. Ai vazhdon tutje duke sqaruar faktin se i ka thënë të akuzuarit se ose duhet të thërrasin policinë, ose duhet të merren vesh, por të njëjtit, sipas dëshmitarit nuk i ka bërë përshtypje kjo. Në konflikt e sipër, dëshmitari pohon se nga kamioni ka nxjerrë një shufër metalike, të cilën babai i tij nuk e ka lënë ta merrte sepse nuk donte zmadhim konfliktesh.
Ai më pas ka thënë se pas 3 minutash pasi që babai i tij ka hipur në kamion ka ndodhur e shtëna.
Dëshmitari po ashtu thotë se nuk ka pasur asnjë lloj përleshje fizike apo goditje mes tij dhe të akuzuarit ose të atit të tij dhe të akuzuarit.
Në cilësi të dëshmitarit është dëgjuar edhe Nijazi Zeneli, pronar i lokalit “Elma”, i cili ka theksuar se Vllaznimi ka ardhur në lokal. Në lokal dëshmitari thotë se ka dëgjuar dy të shtëna, mirëpo nuk e ka parë se kush ka shkrepur me armë zjarri sepse i njëjti ka qenë në kuzhinë.
Vllaznim Hamdija, akuzohet për vrasje të rëndë, posedim të paautorizuar të armës dhe përdorim të armës.
I akuzuari me 29 dhjetor 2019, në rrugën qarkore “NATO 99” në Gjilan, pas një aksidenti të trafikut që ka shkaktuar derisa ishte në gjendje të dehur, ka privuar nga jeta shoferin e kamionit, tani të ndjerin Lulzim Spahiu dhe atë para djalit të tij.
Pas leximit të aktakuzës nga ana e prokurorit të shtetit, i pandehuri Vllaznim Hamdija ka deklaruar se nuk e pranon fajësinë sepse sipas tij, nuk janë të vërteta ato që shkruhen në aktin akuzues.
Në fjalën hyrëse të tij prokurori i shtetit deklaron se mbetet në tërësi pranë aktakuzës sepse e njëjta është e bazuar në prova të arsyeshme që vërtetojnë fajësinë e të akuzuarit.
Në anën tjetër, përfaqësuesja e palës së dëmtuar, avokatja Vlora Kadriu ka deklaruar se e mbështet aktakuzën e prokurorit të shtetit dhe e njëjta thotë se me administrimin e provave do të del në pah fajësia e të akuzuarit.
Mbrojtësi i të akuzuarit Vllaznim Hamdija, avokati Ymer Huruglica në fjalën e tij hyrëse ka deklaruar se me asnjë provë të vetme nuk vërtetohet se i mbrojturi i tij ka kryer veprën penale nga dispozitivi i parë i kësaj aktakuze sepse i akuzuari në fjalë sipas avokatit Huruglica nuk ka shkaktuar rrezik për jetën e një apo më shumë personave të tjerë.
Kryetari i trupit gjykues, gjykatësi Islam Thaçi seancën e radhës për këtë çështje penale e ka caktuar me 25 nëntor 2020 me fillim nga ora 09:30.
