52 mësimdhënës në komunën e Gjilanit janë infektuar me sëmundjen COVID-19. Mirëpo situata me shkollat në këtë komunë është e menaxhueshme. Këtë e pohoi edhe kryetari i komunës, Lutfi Haziri.
Megjithatë, asnjë shkollë publike nuk është mbyllur, ndërsa Komiteti për menaxhimin dhe parandalimin e përhapjes së virusit COVID-19 ka mbyllur dy shkolla private pasi janë konsideruar si buri infeksioni.
Megjithatë nuk bëhet i ditur numri i nxënësve të prekur dhe emrat e shkollave, Haziri siguroi se të gjithë mësimdhënësit janë në vetizolim dhe po monitorohen nga institucionet lokale shëndetësore.
Haziri: 52 mësimdhënës të infektuar
“Numri total i tyre është 52 në komunën e Gjilanit, por është e menaxhueshme. Këta janë në vetizolim dhe në monitorim 24 orë nga ana e institucioneve shëndetësore të komunës së Gjilanit, po qëndrojnë në shtëpi të tyre, dhe nuk ka vendim për mbyllje kolektive të as një shkolle. Dy shkolla private me rekomandim, menaxhmenti i komitetit në Gjilan i ka mbyllë sepse ato kanë qenë, në rastin e parë ka qenë burim i infeksionit dhe edhe shkollat publike janë infektuar nga ky rast”, ka thënë Haziri.
Megjithatë, pesë klasë janë mbyllur përkohësisht dhe kanë kaluar në Skenarin C të mësimit që është ai online.
Haziri thotë se shkollat publike nuk janë burim infeksioni dhe se arsimtarët që kanë rezultuar pozitivë janë prekur nga virusi SARS-COV-2 jashtë ambienteve shkollore.
Haziri: Shkollat publike nuk janë burim infeksioni
“As një shkollë publike nuk është mbyllur, pesë klasë ne i kemi mësim online, sipas opsionit C që e quajmë në strategjinë dhe planin për zbatim të korikullës këtë vit në kushte pandemie, këto pesë klasë janë të një shkolle fillore në komunën e Gjilanit... Nuk kemi burim të infeksionit brenda shkollës, burimi i infeksionit ka ardhur prej jashtë shkollës. Në dy rastet e para që i kemi zbuluar ka qenë arsimtar që kanë qenë të infektuar nga jashtë dhe që fatkeqësisht mandej ka rezultuar edhe më bartje të infeksionit në disa raste, më e shumta tek arsimtaret se sa tek nxënësit”, ka thënë Haziri.
Ndryshe, Gjilani është komuna e dytë pas Prishtinës sa i përket numrit të rasteve me COVID-19 me 1331 të infektuar gjithsej. Prej tyre, janë shëruar 1054 qytetarë ndërsa 40 prej tyre e kanë humbur betejën me këtë sëmundje. Aktualisht, sipas të dhënave të Ministrisë së Shëndetësisë, në këtë komunë janë 237 raste aktive.
