Në Ditën Ndërkombëtare të Gruas, në Gjilan hapet fushata me moto “Protestojmë, nuk festojmë”

Gjilani

Në Ditën Ndërkombëtare të Gruas, në Gjilan hapet fushata me moto “Protestojmë, nuk festojmë”

Më: 8 mars 2022 Në ora: 16:27
Fushata me moto “Protestojmë, nuk festojmë”

Në Ditën Ndërkombëtare të Gruas, në Gjilan është hapur fushata me moto “Protestojmë, nuk festojmë”, nën organizimin e Zyrës për barazi gjinore, ku është bërë vendosja e këpucëve të kuqe në shkallët e teatrit, që simbolizon vrasjet e grave dhe vajzave ndër vite.

Nënkryetarja e Komunës, Leonora Morina – Bunjaku, pasi ka vlerësuar lartë rolin e grave në të gjitha proceset në Kosovë, ka thënë se prioritet i qeverisjes së udhëhequr nga kryetari Alban Hyseni është përkrahja dhe zhvillimi i rolit të gruas në inovacion, krijimin e bizneseve të reja e stimulimin e tyre për t’i arritur qëllimet dhe idetë e tyre në të gjitha sferat.

Me rastin e kësaj Dite, dua t’ju përcjell urimet më të sinqerta nënave dhe motrave tona për festën e tyre. Gratë kanë kaluar një rrugëtim të mundimshëm në jetë për t’i fituar të drejtat e tyre. Por, gjithsesi ne nuk kemi nevojë që vetëm një ditë t’i kujtojmë përpjekjet e tyre. Ato duhet respektuar dhe fuqizuar në vazhdimësi. Dita Ndërkombëtare e Gruas është dita ku shënohet lufta e grave për barazinë e tyre ekonomike, sociale e politike me burrat”, ka thënë nënkryetarja Morina-Bunjaku.

Zyrtarja për barazi gjinore, Lindita Salihu, është shprehur se sot nuk festojnë për arsyeje se ende nuk ndihen të barabarta në shoqërinë tonë.

“Nuk festojmë sepse nuk ndihemi ende të barabarta në shoqërinë tonë dhe lë shumë për të dëshiruar nga ajo çka na garanton Kushtetuta dhe ligjet e aplikueshme në vend. Të gjitha statistikat tregojnë se gratë dhe vajzat janë të nën-përfaqësuara në të gjitha sferat e jetës. Vetëm 20 për qind e grave janë aktive në tregun e punës, vetëm 6 për qind e grave trashëgojnë pjesën që u takon, përqindje e vogël e grave janë pronare të paluajtshmërive në regjistrat publikë, ndërsa një përqindje të madhe i gjejmë gratë viktima të dhunës në familje”, ka thënë Salihu.

Arjeta Maka nga organizata “Gruaja Hyjnore”, tha se kjo ditë shërben jo vetëm për bashkimin e grave pa dallim race, feje e kulture, por edhe për t’i kujtuar përpjekjet për barazi, paqe e drejtësi, në ndërtimin e barazisë gjinore e thyerjes së tabuve.

Ndërkaq, menjëherë pas këtij aktiviteti, në Galerinë e Qytetit është hapur ekspozita me temë “Roli i Gruas në Shoqëri”, të organizuar nga OJQ “Gruaja Hyjnore”, e mbështetur nga Rrjeti i Grave të Kosovës.

Po ashtu, për nder të Ditës Ndërkombëtare të Gruas, Kuvendi i Komunës ka mbajtur një mbledhje, ndërkaq në ora 17:00 do të hapet ekspozita “Muza”, organizuar nga Arta Ramadani Jashari dhe Arbenita Kërqeli (Galeria e Qytetit).

commentFirst article
Sot mund të lexoni Shfletoni kopertinat