Agjencia për Informim dhe Privatësi(AIP) ka paralajmëruar gjobë për Komunën e Gjilanit për shkak të mostransparencës dhe mosrespektimit të Ligjit për qasje në dokumente zyrtar.
Ky veprim vjen pasi Partia Demokratike e Kosovës (PDK) – dega në Gjilan, ka kërkuar disa herë qasje në dokumente të ndryshme, por ka hasur në vështirësi për të marrë informacionin e kërkuar.
PDK ka pretenduar se disa nga kërkesat kanë pasur lidhje me dyshime për keqpërdorime financiare, tenderë të dyshimtë dhe punësime të dyshimta, por sipas tyre, Kryetari i Komunës, Alban Hyseni, ka shmangur përgjegjësinë dhe ka shkelur Ligjin për qasje në dokumente publike. Si pasojë e kësaj, PDK e ka adresuar çështjen te AIP.
AIP, duke marrë parasysh heshtjen e Komunës ndaj kërkesës për informacion, ka kërkuar përmirësimin e situatës përpara se të shqiptohet ndonjë gjobë administrative.
Kjo situatë pasqyron një mungesë transparence dhe llogaridhënieje nga ana e qeverisjes komunale, e cila, sipas PDK, po krijon një atmosferë të pasigurisë dhe dyshimeve për shkelje të mundshme në menaxhimin e burimeve publike.
