Instituti Demokratik i Kosovës (KDI), në bashkëpunim me Kuvendin e Republikës së Kosovës, kanë mbajtur sot në Gjilan, tryezë diskutimi me temë “Impakti i Marrëveshjeve të dialogut Kosovë-Serbi në rajonin e Gjilanit”. Qëllimi i kësaj tryeze ishte promovimi i bashkëbisedimit në mes deputetëve të rajonit të Gjilanit, përfaqësueseve të Komunës së Gjilanit, shoqërisë civile si dhe qytetarëve lidhur me procesin e dialogut Kosovë – Serbi.
Konkretisht në tryezë u diskutua rreth marrëveshjeve të Brukselit të cilat kanë ndikim të drejtpërdrejtë në jetën e banorëve të Anamoravës, siç janë marrëveshja për lëvizjen e lirë, njohja reciproke e diplomave, kodi telefonik e çështje të tjera që lidhen me këto marrëveshje.
Pjesë e panelit diskutues ishin deputetët e Kuvendit të Kosovës: Valdete Bajrami, Murat Hoxha, Ismajl Kurteshi, Zenun Pajaziti, nënkryetari i Komunës së Gjilanit Rexhep Kadriu, Jeta Krasniqi nga KDI, Nebojša Simic nga CKSD, Enver Këqiku nga Qendra Kosovare për Bashkëpunim Ndërkombëtar si dhe përfaqësues të organizatave të ndryshme të shoqërisë civile e qytetarë.
Ajo çfarë u theksua ishte nevoja për më shumë transparencë rreth këtij procesi, pjesëmarrje më e madhe e nivelit lokal në këto diskutime, ofrimi i zgjidhjeve praktike të qytetarëve të të dyja komuniteteve ndërsa zbatimi i marrëveshjes së diplomave u theksua si një ndër sfidat më të mëdha për këtë rajon. Çështje të tjera që u debatuan ishin edhe krijimin i asociacionit të komunave me shumicë serbe si dhe procesi i decentralizimit.
Deputet e pranishëm në këtë takim u zotuan që do adresojnë çështjet e ngritura në këtë diskutim në Kuvendin e Kosovës.
Kjo tryezë organizohet në kuadër të memorandumit të bashkëpunimit të nënshkruar në mes KDI-së dhe Kuvendit që synon rritjen e pjesëmarrjes së qytetarëve në kuadër të dialogut Kosovë-Serbi si dhe fuqizimin e rolit mbikëqyrës të Kuvendit ndaj Qeverisë, me financimin e Ambasadës së Zvicrës në Prishtinë.
