Dy donatorë nga Gjermania, prifti Erih Stainer dhe mërgimtari Aqif Isufi, tani pensionistë, kanë sjellë ndihma ushqimore dhe higjienike për 20 familje skamnore në Gjilan, të cilat ata i kanë siguruar për nevoja të qytetarëve me gjendje të vështirë sociale në Kosovë.
Me këtë rast Aqif Isufi ka bërë të ditur se kjo nuk është hera e parë që sjellin ndihma për skamnorët në Gjilan, pas luftës, duke premtuar se kjo nuk do të jetë as e fundit.
Nga ana e tij, prifti Erih Stainer ka thënë se ai kishte ngelur i prekur nga gjendja e refugjatëve shqiptarë gjatë kohës së luftës, andaj kishte vendosur që të vazhdojë të merret me këtë aktivitet humanitar edhe pas luftës.
Ramadan Murtezi, shef i sektorit të Ndihmave Sociale në Gjilan, ka thënë se këta dy bamirës, me mjetet që i kanë grumbulluar në Gjermani, kanë blerë artikuj ushqimorë dhe higjienikë për 20 familje të cilat gjenden në listat e asistencës sociale.
“Pakot e ndihmave që përmbajnë 14 artikuj ushqimorë e higjienikë, përfituesve u janë dërguar nëpër shtëpitë e tyre”, ka thënë Murtezi.
Ndryshe, Isufi dhe Stainer më herët kanë ndihmuar nevojtarët në Zhegër e Llashticë. Ndjeshmëria e tyre ndaj skamnorëve ka filluar gjatë luftës, kur ata kishin ndihmuar refugjatët në Shqipëri.