Federata Ndërkombëtare e Hendbollit të martën ka prezantuar topin zyrtar për Botërorin e 27-të. Kampionati Botëror mbahet në Egjipt prej 14 deri më 31 janar.
Bëhet fjalë për një top të veçantë dhe shumë të bukur.
Edhe prezantimi i topit të ri nga IHF-ja është bërë në mënyrë të veçantë. IHF-ja ka paraqitur topat zyrtarë nga disa kampionate botërore.
Në faqen zyrtare në “Instagram”, IHF-ja ka paraqitur fotografi të katër lojtarëve të ndryshëm me top në dorë, nga ndeshje të botërorit, ndër ta edhe të Taip Ramadanit, përzgjedhësit të Kosovës.
Fotografia e Ramadanit e publikuar nga IHF-ja është bërë gjatë një aksioni në sulm në Botërorin e vitit 2005 të mbajtur në Tunizi.
IHF-ja ka paraqitur edhe fotografitë e legjendës, Talant Dujshebaev, algjerianit Abderrahim Berriah dhe danezit Morten Olsen.
Selektori ynë, Taip Ramadani ka luajtur në katër kampionate botërore për Australinë, në Egjipt, Portugali, Tunizi dhe Kroaci. 48-vjeçari është paraqitur edhe në Lojërat Olimpike të Sydneyt, në vitin 2000. Për Australinë i ka luajtur 140 ndeshje. Australinë e ka udhëhequr prej vitit 2009 deri në vitin 2013. Edhe si trajner ishte në dy kampionate botërore. Pra ka karrierë të madhe.
Te Kombëtarja e Kosovës është prej vitit 2016. Ecja para evidente, për ata që e pranojnë realitetin. Por hapa tjerë të mëdhenj synojmë, duke filluar nga ky vit. Natyrisht së bashku me përzgjedhësin Ramadani.
