Haradinaj: Dhënia e tokave për të marrë viza, lojë dhe tradhti e pastër që i është bërë popullit - Bota Sot
Haradinaj: Dhënia e tokave për të marrë viza, lojë dhe tradhti e pastër që i është bërë popullit

Intervista

Haradinaj: Dhënia e tokave për të marrë viza, lojë dhe tradhti e pastër që i është bërë popullit

Nga: Arbnore Zhushi Më: 20 maj 2019 Në ora: 08:05
Gazetarja e gazetës "Bota sot", Arbnore Zhushi dhe nënkryetari i OVL të UÇK-së, Nasim Haradinaj

Nënkryetari i OVL së UÇK-së Nasim Haradinaj, ka thënë se kjo Organizatë përkrah iniciativën për Themelimin e Tribunalit që do të merret me gjykimin e krimeve serbe në Kosovë, nëse Rezoluta amendamentohet dhe kërkohet të futet në ligj të Prokurorisë Speciale. Në një intervistë për gazetën “Bota sot”, ai ka thënë iniciativa e Kryetarit të Kuvendit Kadri Veseli, nëse mbetet vetëm si Rezolutë, do të ishte një farsë politike.

Haradinaj ka thënë se është i gatshëm të dëshmojë para Gjykatës Speciale dhe se nuk do të ishte i befasuar nëse ftohet nga ajo.

Nënkryetari i OVL së UÇK-së ka deklaruar se është pro korrigjimit të kufijve Kosovë-Serbi, por jo edhe shkëmbimit të territoreve. Ai ka kritikuar Qeverinë e Ramush Haradinajt, për tradhti se ka dhënë toka për viza, të cilat nuk iu kanë liberalizuar Kosovës ende.

“Bota Sot”: Sa jeni të kënaqur me punën që ka bërë Qeveria e Kosovës për veteranët dhe me shoqatat e dalura nga lufta? A po e marrin trajtimin dinjitoz ashtu siç e meritojnë?

Haradinaj: Qeveritë në përgjithësi ndoshta kanë pasur më shumë mundësi që t’i trajtojnë më mirë veteranët e sidomos përderisa thirren krejt jetën në luftë, si pozita, si opozita. Por, bazuar në atë që thirren në luftë, pak kanë bërë për veteranët. Ne i kuptojmë rrethanat në të cilat jemi, jemi shtet i ri dhe veteranët në një farë mënyre e kanë detyrë ta kenë barrën kryesore, si në luftë, edhe tash. Por, mendoj se nuk kanë bërë çka kanë mundur të bëjnë.

“Bota sot”: Kemi parë një iniciativë të kryeparlamentarit Kadri Veseli, për formimin e një Tribunali, që do të merret me gjykimin e krimeve serbe në Kosovë. Si e komentoni këtë iniciativë të tij?

Haradinaj: Ne e kemi dhënë mendimin tonë. Nëse kjo iniciativë, mbetet vetëm si Rezolutë, kjo është një farsë. Por nëse kjo amandamentohet dhe kërkohet të futet në ligj të Prokurorisë Speciale, që ishte me amandemente, atëherë mendoj që është iniciativë e duhur dhe besoj që do të arrijë efektin e vet. Organizata e Veteranëve të Luftës, edhe pse shumë herë është keqpërdorur qëllimisht, asnjëherë nuk ka qenë kundër zbulimit të krimeve që kanë ndodhur në Kosovë. Por, ka qenë kategorikisht kundër Gjykatës në formë një etnike ose parciale. Deputetët tanë e kanë votuar për turp këtë Gjykatë, kjo është raciste dhe e pa të drejtë që ka ndodhur vetëm në inkuizicionet dhe ligjet ku ka pasur Hitleri, fashmizmin, kur i ka ndjekur jahuditë.

“Bota sot”: Sa ka gjasa që të formohet një Tribunal i tillë, kemi parë nga ekspertët ligjorë që janë pesimistë se mund të formohet ai?

Haradinaj: Unë po them se Organizata e Veteranëve nuk do të qëndrojë duarkryq. E kanë shansin e fundit së pari deputetët e turpëruar me vendosjen e nënshkrimit të asaj Gjykate, në një farë mënyre të nxirren veten. Ne presim që të miratohet kjo rezolutë, Rezolutat nuk janë obligative. Presim që Ligji të amandamentohet dhe të inkorporohet po aty. Organizatën e Veteranëve të Luftës, nuk e pengon zbulimi i krimeve, por i të gjithëve atyre që kanë bërë krime. Kuptohet në Kosovë nuk ka jetuar vetëm nacionaliteti shqiptar dhe kuptohet që nuk kemi mundur të bënim ne krime kundër serbëve, por ata tek ne. Kështu që duhet të zbulohen të gjitha krimet. Prandaj, ne jemi të gatshëm, së pari si veteranë, po e them edhe prej vetes, le të fillojnë dhe të zbulohen të gjitha krimet aty ku janë, sepse vetëm kështu kthehet dinjiteti i UÇK-së, puna e mbarë për shtetin dhe vetëm kështu ndalen këto farsa politike. Nëse Rezoluta votohet prej të gjithëve, aty është një farsë politike që po e bën pozita dhe opozita. Mos t’iu hy partive rend, sepse ato do të jenë unike. E keqja dhe tragjedia e kombit është kështu se këto partitë tona janë unike, vetëm në çështjet farse vetëm prej frike që po i humbin votat, po e përkrahin njëri-tjetrin. Në vend që të bëhen unike në çështjet dhe temat interesante dhe thelbësore, ato bëhen bashkë vetëm në Rezoluta. Të shohim a do të bëhen bashkë në amadamentim të Ligjit. Këtu do të shihet e drejta, guximi dhe sinqeriteti i deputetëve.

“Bota sot”: Gjykata Speciale ka nisur intervistimin e ish-luftëtarëve të UÇK-së. A keni marrë ju ftesë nga kjo Gjykatë dhe nëse merrni si do t’i përgjigjeni asaj?

Haradinaj: Për mua, çdo pjesëtar i UÇK-së është target i kësaj Gjykate. Nuk do të befasohem nëse ftohem edhe unë nesër. Unë jam i gatshëm. Detyra e UÇK-së ka qenë të vriste ushtrinë serbe, asnjë detyrë tjetër nuk kemi pasur. Unë personalisht kam pasur punën shumë të mirë, kam pasur pagën 47 mijë kruna (rreth 5 mijë euro në Suedi), bashkë me familjen. Të gjithë farefisin e kam pasur atje. Thjeshtë kam ardhur në Kosovë, për të çliruar vendin tim. Ky ka qenë edhe misioni im kur jam përshëndetur me familjen dhe jam nisur për Kosovë. Si çlirohet vendi nga një okupator? Duke e vrarë! Edhe e kemi vrarë sa kemi mundur, edhe ata na kanë vrarë sa kanë mundur. E keqja është se ata kanë bërë krime ndaj civilëve, kanë bërë dhunime, gjenocid. Shpesh përmendet që ata kanë bërë krim. Krimet ndodhin vetëm në shtete të lira, por edhe masakra mund të quhen se janë përfshirë një grup. Por Serbia në Kosovë ka bërë gjenocid, sikur fashizmi ndaj jahudive. Janë vrarë njerëzit, janë dhunuar nënat jo për epshe, por për të na shuar si qenie vetëm pse jemi shqiptarë. Nuk e di cili është termi i gjenocidit pos këtij. Nëse Haga ka detyrë të marrë ushtarë se ka vrarë ushtrinë serbe, e ka gabim. Le të na thirrë të gjithëve se atë punë e kemi pasur. Atë punë e ka kryer edhe NATO-ja. Lufta jonë ishte çlirimtare dhe e imponuar, neve na kanë detyruar të futemi në luftë.

“Bota sot”: Një ish-luftëtari të UÇK-së së fundmi i është refuzuar viza turistike për Kanada, me arsyetimin se UÇK-ja ishte terroriste?

Haradinaj: Ai ka qenë edhe tek ne në zyrat tona. Ajo është një diçka që duhet ta sqarojë Ambasada Kanadeze. Mendoj se është një shkelje e të drejtave të njeriut, ose aty është një i dezinformuar aq fortë, edhe pse mendoj se nuk kanë faj njerëzit që janë të dezinformuar, sepse ne vet këtu brenda kemi probleme se kush ishte UÇK-ja. Ne kemi një Komision të ngritur menjëherë pas luftës në krye me Eqrem Kryeziun dhe Nekibe Kelmendin dhe shkruan “Ekipi për zbulimin e krimeve të UÇK-së” që ka bërë në Kosovë dhe kjo është për turp. Derisa këta bëjnë këtë, edhe të tjerët nuk kanë faj që janë të dezinformuar. Për ta shpallur një njeri kriminel, duhet të del vendimi nga Supremja, i vërtetuar nga instanca e dytë gjyqësore. Kur atëherë vërtetohet mund ta quash të pafajshëm ose kriminel. Nuk mund të quhesh fajtor edhe nëse je duke u gjykuar, deri të shpallesh fajtor.

“Bota sot”: Deri ku kanë shkuar hetimet që ka nisur Prokuroria për rastin e listave të veteranëve ?

Haradinaj: Këtu është një konfuzion i çështjes së hetimeve dhe listave të veteranëve, sepse duhet t’i ndajmë dy gjëra. Shumë njerëz kanë konfuzion dhe nuk e kuptojnë se Organizata e Veteranëve nuk ka qenë në Komision për Verifikim, ka qenë një Komision krejt tjetër pranë Qeverisë, që e ka bërë verifikimin, do të thotë ka qenë ai Komisioni që tash po hetohet dhe ka aktakuzë ndaj tyre. Prokurorinë e ka thirrë Organizata e Veteranëve, sepse e kemi parë që ka fryrje të listave. Kështu që Organizata e Veteranëve është pro asaj që të nisë procesi i hetuesisë dhe të zbulohen ata të cilët, kanë bërë këtë fryrje dhe të marrin dënimin penal, nëse vërtetohet se ata kanë bërë këtë gjë. Këtu kryhen dy procese: e para qartësohet edhe në opinion gjithë kjo llomotitje dhe sulm ndaj veteranëve dhe listave, sepse është bërë që edhe ata që janë vërtetë veteranë të ndihen keq. Normal që fajtorë janë të gjithë, por më së shumti politika. Listat i ka fry politika, përpos këtyre tjerave që munden me qenë familjarizëm, nepotizëm e korrupsion. Ne jemi për procesin e verifikimit të këtyre veteranëve. Ne jemi në mbështetje të Gjykatës dhe Prokurorit. Nëse ajo vërteton se kjo listë është e saktë, edhe për neve është e saktë. Mirëpo ndalen fjalët: Jo u frynë, jo nuk u frynë.

“Bota sot”: Jeni treguar kritik ndaj ambasadorëve të huaj në Kosovë. Pse?

Haradinaj: Unë jam treguar kritik ndaj tre ambasadorëve. E para herë ka qenë ndaj ambasadorit anglez dhe më pas atij amerikan. Është vërtetuar që unë kam bazë, sepse të del një ambasador dhe të merr ligjin në një shtet, kjo është e ndaluar, pa marrë parasysh a është shtet i vogël, a është në konsolidim. Nuk e ka atë të drejtë një ambasador. Të marrësh ligjin në dorë dhe të thuash që një pjesë e madhe e eprorëve të UÇK-së kanë kryer krime, kjo do të thotë veç ky e mori ligjin në dorë, paragjykoi dhe një një farë mënyrë i vendosi para aktit të kryer. Ai nuk e ka pasur detyrën e prokurorit dhe ka bërë gabim, për këtë e kam kundërshtuar dhe e kam quajtur palaço. Një palaço dihet ku e ka vendin dhe tash kush është cirku? Parlamenti ynë, sepse ia mundësoi atij të sillet ashtu. Një ambasador të hyjë në parlament, t’ua hap dyert dhe t’i ndjekë edhe në tualet deputetët dhe të bëjë presion mbi të zgjedhurit e popullit. Ajo ka qenë fjala më e butë ndaj tij, duke pasur respektin për Amerikën. Ai e mori vendin e vet dhe eci, e mua viza amerikane kurrë nuk më është ndalur, edhe pse shumë kanë menduar, disa janë gëzuar, disa janë frikësuar pa nevojë… Amerika i don njerëzit e fortë dhe ata që e dojnë vendin e vet. Një mik i fortë kurrë nuk e bën një mik të ligë. Cili shtet të respekton ty, derisa ti nuk e respekton vendin tënd. Politika jonë e ka orientuar popullin të shoh televizionin dhe takimet e politikanëve të huaj me tonët se çka po bëjnë. Derisa këta nuk janë të fortë për vendin e vet, veç kanë me shkuar si kukulla dhe me u kthy sërish, siç ishte rasti i Berlinit. Pak më intereson mu në kuptimin a shkon bashkë kryeministri me presidentin, qysh po doken, më intereson rezultati që sjellin ata. Unë pres tash në Samitin tjetër kur të shkojnë, aty pres të shoh rezultatin e tyre, çka po sjellin.

Ndërsa, me ambasadorin zviceran, unë mendoj që atë ditë ai ka bërë gafë dhe doli jashtë protokollit të vet. Ai zuri në thua dhe më duket që e humbi kontrollin dhe nisi të përzihej në pjesën e veteranëve. Atë ditë, ai është dashur t’i kërkojë falje këtij populli, sepse një qytetare e tij plakë, preu një fëmijë shqiptar me thikë në fyt dhe unë mendoj se nëse ka dashur të hyjë andej, është dashur të kërkojë falje. Arsyeja që e bëri ajo thotë, për tërheqjen e vëmendjes së qeverisë zvicerane ndaj popullit dhe shtetit të vet. Ai pati boll çka të kritikonte shtetin e vet. Por, ai u mundua të na fyente pa na kërkuar falje.

E dyta, Zvicra është pjesë që mundet të na ndihmojë me pastrimin e listave. Kemi shumë luftëtarë këtu veteranë, që janë edhe qytetarë zviceran dhe marrin rrogën e veteranit njëkohësisht në dy vendet. Veteranëve në Kosovë kush punon, nuk i takon ky pension. Ajo mundet të na ndihmojë, sepse ka shumë të dhëna, sepse pensionet po i gjen Zvicra. Ajo e din kush merr pension edhe në Kosovë dhe të njëjtëve po ua ndalon pensionin e vet atje. Le të na ndihmon kështu.

Veteranit nuk i takon me marrë pension në të dyja shtetet. Nëse ai dëshiron të na ndihmojë, le të reflektojë vet. Unë nuk jam kritik ndaj tyre. Kosnettin e kam përshëndetur. Normal ne i kemi miqë, por miku nuk duhet të kalojë pragun aty ku nuk i takon.

“Bota sot”: A mendoni që kritikat si tuajat mund të ndikojnë në zbehjen e miqësisë me këto vende mike?

Haradinaj: Jeni gabim. Mendoj se miqtë duhet kritikuar mes vete, armiqtë luftojnë. Nëse ne i pranojmë kritikat e tyre, le t’i pranojnë edhe ata tonat. Kritika nuk e ka kuptimin e zbehjes së miqësisë, sepse nëse është kështu zbehen edhe marrëdhëniet prind-fëmijë. Neve na kanë ndihmuar faktori ndërkombëtar, nuk na ka ndihmuar pse na kanë dashur, pse kemi qenë simpatikë… NATO-ja nuk ka ndihmuar pse “iu ka tek”. NATO-ja na ka ndihmuar në kohën kur ka festuar 50 vjetorin e themelimit, atëherë kur ka bombarduar në Kosovë. Pse? Na ka ndihmuar, sepse vetëm atëherë ne si faktor, e kemi bind se e kemi përnjëmend luftën për liri dhe Serbia bëri masakra që u pa haptas. Kur ata na shohin që politikanët tonë duan të bëjnë shtet, na ndihmojnë. Kur shohin cirkun që po bëhet, këto lojëra dhe pazare që po bëhen mes pozitës dhe opozitës, atëherë edhe faktori ndërkombëtar luan “macen me miu”.

Nuk mund të ftohen marrëdhëniet, pasi jemi shtet i ri. Krejt normale është, e vetmja pakënaqësi është që ne kemi shansin të ecim më shpejtë, aty ku ka qenë amaneti i luftëtarëve. Amaneti i tyre nuk është kryer, sepse ne nuk kemi pasur betim për këtë pjesë të Kosovës Administrative, sepse është tradhtuar edhe ai kufi. Kështu që Kosova e shpallur në kufijtë e pavarësisë, sot është hartë e zgrapsuar (kafshuar), asaj iu kanë marrë 11 mijë hektarë nga Mali i Zi, që sot po e quajnë mik. Por, mos të harrojmë se ana e Dukagjinit nuk ka luftuar me serbët, po pjesën më të madhe dhe vrasësit më të mëdhenj kanë qenë malazezët dhe serbët e Malit të Zi. Unë nuk e kuptoj cila është harta jonë, me u çu me e nënshkruar një Demarkacion, më turp nuk ka. As Esat Pasha ndryshe nuk i ka dhënë trojet, veç i ka nënshkruar dhe ua ka jep tokat.

“Bota sot”: Po tash me idenë e korrigjimit të kufirit. Kemi parë presidentin që herë zmbapset, herë i kthehet idesë?

Haradinaj: Se sa herë zmbrapset presidenti unë nuk e di, mirëpo me korrigjim jam dakord edhe unë. Unë nuk kam dëgjuar që presidenti ka thënë shkëmbim. Me korrigjim jam dakord, sepse edhe si nxënës ne kemi pasur korrigjime, mirëpo ato nuk janë bërë për të keq, por për të mirë. Një korrigjim për të mirë, është amanet i krejt luftëtarëve. Nëse ne e marrim vetëm një shtëpi, ose 2 km më shumë, kujt i pengon kjo?

Kush e tha që duhet të japim veriun? Korrigjim nëse bëhet mirë, nëse nuk bëhet, jemi këtu ku jemi. Këta që po thonë po e ndalim veriun, kush po ua jep atëherë. Nëse ne paskemi forcë me ndalë, nuk ta merr atë askush. Kjo politikë po çon në përçarjen e faktorit politik dhe mendjes së popullit dhe po bëhen zhurma. Mund të ndodhin të dyja, ta marrin andej dhe ta humbin këndej. Po nëse këtë e kemi, nuk kemi nevojë me humb. Nëse këtë nuk e kemi, që padrejtësisht na janë marrë, pse mos t’i kërkojmë. Pse Serbia nuk po thotë mos të kërkojmë Kosovën se na e marrin Preshevën?!

Pse ne duhet të themi “mos të kërkojmë Preshevën se na e marrin veriun”? Vet po ua mundësojmë këtë?! Korrigjimi nëse bëhet për të mirë, unë e përkrahi me krejt qenien time dhe besoj që krejt luftëtarët janë për këtë. Shumë njerëz po e luajnë politikën e serbit. Vet fakti që ta thuash në popull që munden të na e marrin Mitrovicën, nuk është kjo diçka e vogël. Këtë propagandë serbe është shtrenjtë me pagesë, e ne e bëjmë pa para. Shkëmbimet janë pazare dhe janë të dëmshme për shtetin tonë.

A po thotë kryeministri që do ta kthejë demarkacionin? Po e dhanë ata që po e kritikojnë, opozita. Nëse ka qenë që duhet me dhënë tokë për viza, është turpi më i madh. Vizat duhet t’i blejmë me toka? Cili shtet ka blerë viza me toka? Si popull nuk është dashur të pranojmë këtë. Ata deputetë që kanë votuar për të dhënë toka për viza, duhet ta lëshojnë këtë vend dhe kurrë nuk duhet të na kërkojnë sërish vota. Nuk kemi nevojë të kemi përfaqësues dhe deputetë që sjellin viza dhe liri të lëvizjes, duke dhënë toka shqiptare. Ne sikur ta pranonim si popull shqiptar që kemi qenë nën Serbi, ne i kishim vizat. Nëse do të ishte kështu, nuk kemi pasur nevojë të vrisnim as të luftonim. Të japësh tokë në shekullin 21 për vizë, është turpi më i madh dhe kjo na kthen në kohën kur njerëzit nuk dinë të logjikojnë se çfarë bëjnë. Ky ka qenë një gabim i madh. E kanë hipnotizuar popullin, aq sa mjafton të thotë dikush një fjalë dhe të thonë ky e ka mirë me Amerikën, ky me Anglinë… çfarë janë këto. Ai që nuk e ka mirë me popullin e vet, ai nuk e ka mirë me askënd, nuk do ta respektojë askush, madje as familja e vet.

A e din sa populli po merr pasaporta serbe? Edhe gjysma e deputetëve tash i kanë marrë të Shqipërisë, për të mos u bërë horë, pasi gjysma i kanë pasur pasaportat serbe në xhep. Tash Shqipëria ua ka dhënë pasaportat shqiptare, edhe pse kanë pasur pasaporta diplomatike, por kanë teze, nipa… Pse mediat nuk po merren me këtë temë? Dhënia e tokave për të marrë viza, kjo është tradhti e pastër dhe lojë që i është bërë popullit. Edhe sikur të na jepnin vizat, prapë është tradhti./Vijon në numrin e nesërm

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...