Nënkryetari i Lëvizjes Vetëvendosje dhe ish ministër i MPJ-së në qeverinë Kurti, Glauk Konjufca, në një intervistë ekskluzive për gazetën “Bota sot”, ka shpalosur qëndrimet e tij dhe të partisë së tij, lidhur me zhvillimet politike në vend.
Teksa ka folur për delegacionin e Kosovës të cilët kanë udhëtuar në SHBA për takim me përfaqësuesit e palës serbe, Konjufca e quan të mjerueshëm këtë delegacion dhe thotë se janë njerëz më të dobët me vota në histori të shtetit tonë.
Ish kryetari i Kuvendit shprehet se qeveria Hoti i vendosi nëpër poste kyçe njerëzit të cilët ishin shumë kundër Albin Kurtit dhe Vjosa Osmanit, ndërsa kryeministrin aktual e quan një piun të Isa Mustafës, i cili erdhi në atë pozitë për shkak të pamundësisë së kreut të LDK-së për ta marrë vet atë post.
Konjufca ka folur edhe për skenarin për presidentin e Kosovës, nëse ky aktual, Hashim Thaçi, jep dorëheqje për shkak të Gjykatës Speciale.
Teka ka folur për këtë skenar, Konjufca parashikon zgjedhje e jo zgjidhje për çështjen e presidentit, teksa ka thënë se Lëvzija Vetëvendosje do ta ketë një fitore plebishitar.
“Bota sot”: Z.Konjufca, cili është vlerësimi juaj për qeverinë Hoti?
Glauk Konjufca: Mendojë që qeverisja Hoti i ka mangësitë e veta evidente, të cilat po i kushtojnë interesave të qytetarëve të Kosovës, për disa arsye. E para ka të bëjë, le të themi me atë që është e shenjtë në jetën e partive politike, e ajo është kontrata që ato e lidhin me qytetarin, sepse kjo është forma e demokracisë, domethënë partitë si grupime politike formohen për ta përfaqësuar interesin e qytetarit. Në momentin kur lidhet kontrata me qytetarin, ajo implementohet në institucione ku partitë politike i delegojnë të zgjedhurit që zgjedhën prej popullit. Unë mendoj që përmes qeverisjes Hoti kjo kontratë është shkëputë, që në politikë konsiderohet e shenjtë. Pse është shkëput kjo kontratë? Sepse, prej kur Kosova ka kryeministra, logjika e demokracisë shkon kështu, p.sh, në vitin 2007 Hashim Thaçi ka qenë kandidat për kryeministër dhe i ka mposhtë të tjerët dhe është bërë kryeministër i Kosovës. Në vitin 2011, prapë Hashim Thaçi i ka fituar zgjedhjet dhe është bërë për herë të dytë kryeministër i Kosovës. Herën e tretë, nuk i ka fituar zgjedhjet Isa Mustafa, por e ka kushtëzuar koalicionin me postin e kryeministrit dhe është bërë kryeministër pa i fituar zgjedhjet. Ky ka qenë një lloj devijimi. Në vitin 2017, Ramush Haradinajn e ka qit PAN-i për kryeministër dhe ka fituar ai koalicion, e kanë mposhtë Vetëvendosjen 33% me 28%, ku pastaj kryeministër është bërë Ramushi, sepse me atë kryeministër ka dalë koalicioni PAN-i dhe i ka fituar zgjedhjet. Në vitin 2019, i ka fituar Albin Kurti zgjedhjet dhe në shkurt të këtij viti ka marrë mandatin e kryeministrit përmes Kuvendit. Tash Avdullah Hoti, është një njeri që as nuk ka qenë një kandidat për kryeministër në këto zgjedhje, dhe nëse e shohim fuqinë e tij brenda LDK-së, ai nuk përfaqëson asgjë më shumë sesa një figurë të drejtpërdrejtë, po si në lojën e shahut, një figurë e cila ndoshta do ta merrte formën e piunit nga kryetari i LDK-së, Isa Mustafa. Pra, pse Avdullah Hoti është sot kryeministër i Kosovës, është vetëm për një arsye të thjeshtë, se postin e kryeministrit nuk është duke mundur ta ushtrojë vet Isa Mustafa, përndryshe do të ishte bërë ai. Angazhimi i tepërt dhe shumë aktiv që e merr posti i kryeministrit, e bën atë që për arsye të cilat i ka shpjeguar vet, nuk ka dashur të kandidojë për kryeministër, mirëpo në këto rrethana Avdullah Hoti është vetëm për atë arsye kryeministër i Kosovës, për asnjë tjetër. As pse nuk është më i përgatituri, as pse e ka zgjedhur populli, as pse është më legjitimi, por se Isa Mustafa e ka vendos aty. Këtu fillon dhe përfundon legjitimiteti sa i përket mandatit të Hotit.
Sa i përket qeverisjes së tij, unë mendoj që duke filluar nga përbërja e qeverisë, nëse i shikojmë ministrat e kësaj qeverie se në cilat dikastere janë vendosë ata, p.sh Armend Zemaj në shëndetësi, e të tjerët duke filluar nga Driton Selmanaj e deri te Arban Abrashi. Shihet që logjika e Isa Mustafës ka qenë kështu: kombinim i njerëzve, të cilët ose kanë pasur xhelozi për suksesin e Vjosa Osmanit, ose janë shumë të dëgjueshëm, si puna e Avdullah Hotit, ose janë shpërblyer ata që kanë qenë më agresivë ndaj Vjosa Osmanit. Nëse e shohim Driton Selmanajn, një javë para se të prishet koalicioni VV-LDK, nëse i shohim deklaratat e Abrashit, edhe në seancën ku është diskutuar për mocionin për rrëzimin e qeverisë Kurti, këta kanë qenë më agresivë kundër Albin Kurtit dhe Vjosa Osmanit. Pikërisht këta janë shpërblyer me poste ministrore.
“Bota sot”: Cili është mendimi juaj për delegacionin i cili udhëtoi në SHBA bashkë me kryeministrin Hoti për takimin e 4 shtatorit dhe çka pritni nga ky takim?
Glauk Konjufca: Nëse e konceptojmë prej legjitimitetit popullor, në raport me zgjedhjet, ata njerëz që kanë shkuar atje, konsiderojë se janë të mjerueshëm. Kurrë nuk e kanë përfaqësuar Kosovën njerëz më të dobët me vota në histori të shtetit tonë. Vetëm kur kemi pasur negociata teknike, pra po flas për Edita Tahirin, ajo nuk ka qenë ndonjë personalitet i fuqishëm, mirëpo ishte e mandatuar si në stilin e Skender Hysenit. Pa pasur fuqi politike drejtpërdrejtë prej popullit, por të cakton shefi, p.sh Edita Tahirin e kishte caktuar Thaçi gjatë qeverisjes Thaçi II në vitin 2011, por tash ky delegacion me një kryeministër i cili as nuk e ka parë ëndërr që do të bëhet kryeministër, sepse jo që LDK-ja doli e dyta, por as në radhët e LDK-së nuk ka qenë kandidat për kryeministër. Ai i ka 28 mijë vota dhe e bën atë kryeministrin me më së paku vota prej kur ka jetë parlamentare në Kosovë. Ky ka më pak vota se Ramush Haradinaj në vitin 2004 kur u bë kryeministër në atë kohë. Pra, edhe më pak se atëherë.
Nga ky takim ka shumë të panjohura, meqenëse tash edhe vet qeveria e ka pranuar para disa ditësh përmes zv. Kryeministrit Tahiri, se as delegacioni i Kosovës nuk ka informata të sakta se për çka do të bëhet fjalë. Nëse e sheh te ministri Abrashi, por edhe çfarë komponimi ka ekipi i Serbisë, duket sikur më shumë do të flitet për ato tri letrat e qëllimit të mirë, që i ka arrit Grenell-i mes Kosovës dhe Serbisë gjatë konferencës së Mynihut. Ndërkaq, sa i përket komunikacionit rrugor, d.m.th infrastrukturës së autostradës në këtë rast, lidhjeve hekurudhore dhe ajrore, pra këto marrëveshje të funksionalizohet. Këtu nuk ka pasur më tutje depërtim dhe konkretizim të kësaj që e pati arritur Grenell-i dhe duket sikur një pistë kah mund të shkojnë bisedimet, janë edhe këto tri marrëveshje. Në anën tjetër kryeministri Hoti i ka mbajtur pritjet shumë lartë, duke shpjeguar sikurse ky takim të kishte të bënte me njohjen e Kosovës nga ana e Serbisë, siç duket dhe siç kemi dëgjuar tash edhe nga disa zyrtarë të ultë të Shtëpisë së Bardhë, deri tash nuk duket se ajo do të jetë tema, pra të një niveli politik më të lartë, le të themi se ajo çfarë mendoj se do të ndodh përafërsisht janë këto tri marrëveshje, linja rrugore, hekurudhore dhe ajrore.
“Bota sot”: A i besoni kryeministrit Hoti kur thotë se do të kërkojë njohje nga Serbia dhe nuk do të ketë marrëveshje ku do të preket territori i Kosovës?
Glauk Konjufca: Varet se për çka nikoqiri, në këtë rast SHBA-ja, mendon se është agjenda e bisedimeve dhe takimeve. Unë mendojë që agjendën e takimit nuk e kanë përcaktuar fare palët, meqenëse duket se të dyja palët kanë qenë të rezervuara të flasin sa i përket përmbajtjes. Kjo është edhe një shenjë, se nikoqiri do ta ketë atje përcaktimin më të fuqishëm të kornizës se për çka do të flasin palët dhe në cilin drejtim do të zhvillohet dialogu. Përndryshe, po të ishin marrë vesh palët se cila do të ishte korniza e bisedimeve, të dyja palët do ta kishin më të qartë dhe do të shpreheshin në mënyrë më eksplicite se çka përmban dhe cilat do janë temat e bisedimeve. Mirëpo krejt çka dimë ne, është që vet ai të cilit i është dhënë kompetenca nga Shtëpia e Bardhë, e që është z. Grenell, gjithmonë e ka pasur konceptin dhe e ka shpjeguar prej dimensionit ekonomik. Tash problemi kryesor ka të bëjë me faktin se si mund të shkojnë kaq lehtë në bisedime të nivelit ekonomik, kur dy shtetet nuk njihen në nivel politik, pra Serbia e ka në kushtetutë të vetën Kosovën dhe përpos kësaj e pengon shtetësinë e Kosovës. Qeveria Hoti është treguar shumë e brishtë karshi Serbisë, ky është halli im. Kryeministri Hoti i ka bërë dy hapa, të cilët janë tërësisht në përputhje me të cilat ka kërkuar Vuçiqi. E para heqja e reciprocitet politik, ekonomik dhe tregtar me Serbinë, të cilat i vendosi qeveria Kurti, ndërsa Hoti për t’ia plotësuar dëshirën Vuçiqit për të shkuar në Uashington i largoi, dhe e dyta është ajo me të cilën u pajtua ministrja e jashtme, Meliza Haradinaj-Stublla, për t’u pajtuar me Serbinë se nuk do të ketë aplikim për anëtarësim të Kosovës nëpër organizata ndërkombëtare. Këta janë dy hapa të mëdhenj prapa të qeverisë Hoti. Pra, kjo qeveri në takimin e Uashingtonit, po shkon faktikisht e gjunjëzuar, dhe prej këtij gjunjëzimi, kur ti e heq aspektin kryesor të sovranitetit, se reciprociteti është kurrizi i sovranitetit, pra, ti me ju përgjigj me kartën e njëjtë. Marrëdhëniet ndërkombëtare me një shtet, ku pa kurrfarë arsye të qet problem me dokumente, nuk t’i pranon mallrat, pasaportat, certifikatat etj, e në momentin kur të aplikosh masa të njëjta, e argumenton sovranitetin tënd. Tash Hoti e largojë këtë kurrizin e sovranitetit. E largojë edhe në aspektin ndërkombëtarë anëtarësimin e Kosovës në organizata të ndryshme, domethënë mos të guxojë Kosova të aplikojë. Me këta dy hapa prapa, Hoti po shkon atje dhe po jep deklarata pompoze. Mua po ma kujton Hashim Thaçin. Ju kujtohet prej vitit 2012 deri 2016, thoshte çështja e njohjes është e kryer. Tash pe shihni se jemi më keq se kurrë në kuptimin e pozicionit të Kosovës në dialog, jemi më keq se në vitin 2008, se edhe pas GJND-së, e kemi përparësi edhe atë që e kemi shpallë në vitin 2010. Mos të harrojmë se GJND-ja është gjykatë e OKB-së, nuk është gjykatë e njëanshme. Kjo gjykatë na e ka njohur legjitimitetin e pavarësisë së shtetin tonë, ndërsa tash ne kemi ardhur në pikën ku për Vuçiqin, duhet me heq reciprocitetin dhe anëtarësimin në organizata ndërkombëtare për t’u mundësuar takimi me të. Ky është pozicioni i qeverisë Hoti në dialog.
“Bota sot”: A janë këto arsye pse e refuzuat ftesën e Hotit për pjesëmarrje në takimin e 4 shtatorit në SHBA?
Glauk Konjufca: Ky ka qenë faktikisht një takim i cili totalisht është i organizuar sipas standardeve të ftesës, të cilat i ka vendosur Vuçiqi. Kemi deklarata të Vuçiqit gjatë gjithë vitit 2019, kur u bllokua dialogu për shkak të taksës. Vuçiqi me çdo ndërkombëtar që është takuar, ka thënë se nuk ulem në tavolinë të negociatave pa u hequr tarifa. Kur Albin Kurti e hoqi tarifën dhe e vendosi reciprocitetin, Vuçiqi vetëm e ndërroj kërkesën, se pa u hequr reciprociteti, nuk ulet në tavolinën e bisedimeve. Nuk mjaftojë kjo, e kur e pa këtë qeveri të dobët, e kërkojë edhe mos anëtarësimin në organizata ndërkombëtare, e këtë ia mundësoi Meliza Haradinaj-Stublla, pra Vuçiqi po shkon me këto dy kërkesa të cilat janë plotësuar dhe tash prej kësaj kur ti as reciprocitet nuk po guxon me apliku. Njëanshëm, prej aspektit tënd sovran, me thënë se në SHBA po shkojmë se Serbia po e njeh Kosovën, po tingëllon tamam si ajo e Thaçit në vitin 2012, kur thoshte se ‘edhe pak ka mbetur edhe po kryhet se me këtë dialog njihet Kosova prej anës së Serbisë’, ndërsa ne “sharrojshum” nëpër kompromise të dëmshme. Në vitin 2012 e pranojke njohjen, ndërsa në vitin 2015 na erdhi Zajednica. Kjo tregon se çfarë pozicioni ka Kosova.
“Bota sot”: Çfarë po ndodh me mocionin të cilin e ka nisur Lëvizja Vetëvendosje? A ka pasur takime me përfaqësues të PDK-së për të kërkuar edhe votat e tyre?
Glauk Konjufca: Shefi i grupit parlamentar të VV-së, z. Rexhep Selimi, na ka njoftuar se ai ka kontaktuar të gjitha grupet parlamentare për t’ua shpjeguar konceptin e mocionit dhe deri tash nuk është përgjigjur askush, e as kjo që pretendon që është opozitë brenda Kuvendit, pra PDK-ja. Nuk kemi pasur sinjale nga ta se do i sjellin votat për rrëzimin e qeverisë Hoti, as jozyrtare. Kjo ka ndodh për dy arsye. E para është se PDK-ja sipas të gjitha indikacioneve nuk është e gatshme të shkojë në zgjedhje. Ndërsa e dyta është se po mundohen në mënyrë dëshpëruese dhe fort të pasuksesshme, madje shumë anakronike kur po i shohim nëpër debate, që po mundohen të tregohen si faktori kryesor i opozitarizmit, pra me disa taktika me u mundu me lënë në hije Vetëvendosjen në opozitarizëm, pra kinse PDK-ja është opozitarizimi i vërtetë. Kështu që, PDK-ja nuk po i jep nënshkrimet, duke dashur të tregojë se faktikisht nuk i shkon prapa Vetëvendosjes. Dëshiron ta luaj faktorin e pavarur të opozitarizmit dhe i vjen siklet m’i dhënë nënshkrimet, sepse ju duket sikur Vetëvendosja është lokomotiva, ndërsa PDK-ja vagoni. Këto dy arsye më duken mua pse PDK-ja nuk po i jep nënshkrimet.
“Bota sot”: A do të ketë Lëvizja Vetëvendosje vija të kuqe për ndonjë parti në zgjedhjet e ardhshme?
Glauk Konjufca: Lëvizja Vetëvendosje nuk mendon që zgjedhjet e ardhshme do të jenë me vija të kuqe. Lëvizja Vetëvendosje mendon që zgjedhjet e ardhshme janë situatë e një fitore plebishitare që do ta kemi në popull. Kjo për shkak se kemi tri alternativa politike për të cilat mundemi të flasim. Është PAN-i, është LDK-ja dhe është Vetëvendosja. Këto tri fuqi e përbëjnë jetën tonë politike për momentin. Tash nëse e analizojmë secilin, p.sh PAN-in, është ai i cili me të identifikohet e gjithë kapja e shtetit, korrupsioni, shkatërrimi i sistemit të drejtësisë, blerja e gjyqtarëve e prokurorëve. Asnjë rast i korrupsionit nuk është i gjykuar në Kosovë, prej që është shpallur pavarësia e Kosovës. Rastet kryesore, ku janë manipuluar mbi 10 milionë euro, siç është rasti “Toka” e deri te lojërat e fatit, të gjitha janë raste skandale. Kjo për shkak se mafia politike në Kosovë është e fuqishme dhe gjyqësori nuk ka kapacitet që ta çoj një rast deri në fund. PAN-i është ajo alternativë, me të cilën identifikohen këto procese, pra kapja e gjyqësorit, korrupsioni, shkatërrimi i sistemit policor, shkatërrimi i ndërmarrjeve publike, kapja e bordeve, kolapsi i Telekomit, vjedhjet në Trepçë, vjedhjet sistematike nëpër çdo dikaster deri në UP, ku shiten e blihet diplomat, e të gjitha këto.
Tani e kemi alternativën LDK. Kjo ka qenë njëfarë ndërmjetëse mes PDK-së, PAN-it dhe Vetëvendosjes, që e ka luajtur njëfarë roli të iluzionit në popull, kinse është ajo forca e cila e neutralizon PDK-në dhe PAN-in, por nuk është radikale si Vetëvendosje, dhe mundet ta transformojë shoqërinë tonë. Tash çfarë ka bërë LDK-ja me fizkulturat e Isa Mustafës në vitin 2020. Me fizkulturat që i ka bërë shumë të rrezikshme, ia ka dhënë një status të ri LDK-së. LDK si patericë e Hashim Thaçit. Kur është në zor Thaçi, kur ai fillojë me u djersitë prej fuqisë politike të Albin Kurtit dhe Vjosa Osmanit dhe vet mbet si figurë e izoluar politike, kërkojë ndihmën e LDK-së. Ndërsa kur Ramush Haradinaj, Veseli dhe Limaj me një goditje të popullit, u zhvendosën në opozitë menjëherë, Thaçi reagojë me dorën e tij të kapjes së institucioneve, prej kapjes së Gjykatës Kushtetuese, deri te LDK-ja, dhe e ktheu shtetin dhe kushtetutën përmbysë, vetëm për ta rrëzuar qeverinë Kurti dhe LDK-ja pastaj ishte aty e para me ambicie, e gatshme për t’i shërbyer këtij plani. Ky është imazhi i LDK-së në vitin 2020.
Tash Vetëvendosja është alternativa e vetme që ka mbetur, që populli ka për t’u lidhur, sepse ndonëse ishin 50 ditë të qeverisjes së mirë, Vetëvendosja tregoi drejtimin që populli e dinë saktë, prej se si e kemi menaxhuar COVID-19 me Arben Vitinë, e deri te përpjekjet përmes Albulena Haxhiut të Vettingut të gjyqtarëve dhe prokurorëve, proces ky i cili tash me ministrin e AAK-së është shkatërruar dhe nuk ka shpresë për Vetting në Kosovë me këtë ministër e qeveri. E ka krijuar idenë edhe me shkarkimin e Njazi Thaçit në KEK dhe njerëzve si ai, të cilët janë shpërdoruesit më të mëdhenj të ndërmarrjeve publike që i kanë kolapsuar, e Vetëvendosja e tregoi me këto veprime që guxon, që nuk frikësohet, që është e drejtë në atë që i duhet Kosovës. Qytetari i Kosovës ka për ta realizuar këtë që po e shpjegojë, pra këto alternativa dhe ka për ta bërë që fitorja e Vetëvendosjes ka me qenë si në referendum dhe plebishitare.
“Bota sot”: A i shini si arsye të rrëzimit të qeverisë Kurti këto veprime të dy alternativave të para që i përmendet (PAN dhe LDK)?
Glauk Konjufca: Po, pikërisht disa prej këtyre prej të cilave fola. Kur e panë ata që ne veç filluam me ndjekjen e korrupsionit, se ndjekja e korrupsionit ka qenë edhe pastrimi i bordit të Telekomit, ndjekje e tillë është edhe heqja e Njazi Thaçit nga bordi i KEK-ut, sepse ky Njazi Thaçi prej që ka ardhur PDK-ja në pushtet, ka qenë shef i prokurorimit në KEK. Në këtë ndërmarrje, tenderët janë me shtatë shifra zakonisht. Nuk ka tenderë me gjashtë shifra në KEK dhe janë të vogël. Aty ka vetëm miliona. Kështu që me shtatë dhe tetë shifra, nuk ka pas tenderë në KEK, për të cilin nuk ka vendosur Njazi Thaçi, pra prej vitit 2008. Tash kur Vetëvendosja hyri me atë planin e vet të spastrimit të tyre, këta u frikësuan se kjo nuk ndalet deri fort lartë. E kanë ditur se kjo nuk ndalet deri te figurat politike, deri te ministritë, deri te institucionet e larta, jo vetëm bordet. E këtu fillojë ta kaplojë frika vet presidentin, prej këtij hovi të Vetëvendosje për spastrim. Kështu që unë mendoj që kjo ka qenë njëra ndër arsyet, prej të cilave janë frikësuar disa njerëz, nga presidenti Thaçi, e deri te LDK, përfshirë edhe Agim Veliun.
“Bota sot”: A mendoni se ka gisht Grenell-i në rrëzimin e qeverisë, ashtu siç ka deklaruar vet ish kryeministri Kurti?
Glauk Konjufca: Grenell-i mund të mbahet përgjegjës vetëm për atë që reciprociteti ishte pengesë për Vuçiqin. Vetëm kaq. Nuk mendojë dhe nuk kam parë asgjë te Grenell-i që ka kundër një qeverie të zgjedhur nga populli. Kur e kemi takuar në ambasadën amerikane pas zgjedhjeve, ai na e ka uruar fitoren, madje ka thënë se unë jam përfaqësues i SHBA-së për të punuar me ata të cilët i zgjedh populli i Kosovës. Mirëpo plani i Grenell-it ishte se, duke qenë përgjegjës për dialogun, ishte që t’i bënte bashkë palët. Me veprimet e qeverisë Kurti, Vuçiqi e kishte problem, sepse ai duhej të vinte në dialog me kokën poshtë, pra me reciprocitetin e Kosovës dhe kjo atij i dukej humbje. Mos harroni sepse ishte edhe para zgjedhjeve në Serbi dhe opozita atje do ta kishte sulmuar më shumë. Kështu që ai nuk shkonte në dialog, kur e thërriste Grenell-i në tavolinën e Uashingtonit pa këta dy hapa, Kosova me largu reciprocitetin dhe për t’u kthyer gjendja ku ofensivë tregtare ka Serbia në Kosovë dhe i sjellë prapë 500 milionë euro mallra, sepse e ka gjet këtu si livadh, me këto qeveritë tona që ia hapin derën, edhe e dyta me suspenduar Kosova anëtarësimin në organizata ndërkombëtare. Këtu, Grenell-it nuk i konvenojnë këto dyja, sepse plani i tij ishte i shpejtë, për shkak se në SHBA po afrohen data e zgjedhjeve dhe ky synon në një takim më të shpejtë mes palëve, të cilin e arriti. Një të tillë më 27 qershor ia prishi Gjykata Speciale, e këtë tjetrin e arriti.
“Bota sot”: Presidenti ka deklaruar se do të jap dorëheqje nëse i konfirmohet aktakuza, ndërsa për postin e presidentin janë paraqitur disa politikanë, përfshirë edhe Ramush Haradinajn i cili është më i zëshmi në këtë çështje. Cili është parashikimi juaj në këtë proces nëse presidenti Thaçi jep dorëheqje?
Glauk Konjufca: Lëvizja Vetëvendosje ka qenë kundër themelimit të Gjykatës Speciale, sepse jo që ne jemi kundër vënies së drejtësisë në vend për të gjitha viktimat në Kosovë gjatë luftës, mirëpo ajo për cilën kemi qenë kritik, ka pasur të bëjë së pari me statusin e Gjykatës. Kjo gjykatë është e krijuar për krimet në Kosovë të pretenduara të UÇK-së, pra kjo është ajo që definohet kjo gjykatë. Ne mendojmë që krimet më të mëdha gjatë luftës në Kosovë, është gjenocidi serb që e ka ushtruar ushtria dhe policia serbe. Nëse e shohim se sa njerëz janë dënuar në Hagë për këtë gjë, e kuptojmë se ekzistojnë mijëra pjesëtarë të ushtrisë, të policisë dhe të paramilitarëve serb të cilët sot enden të lirë nëpër Serbi, për të cilët nuk ka pasur kurrfarë procesi gjyqësor. Shumë prej tyre dihen me emra dhe mbiemra. Organizata e të pagjeturve në Kosovë, thirrjet e nënave të Gjakovës, të cilat kanë edhe letërnjoftima origjinalë të kriminelëve serbë, të cilët kanë dhunuar gra shqiptare gjatë luftës nëpër objekte të braktisura, ku i kanë harruar edhe dokumentet e identifikimit, ndonjëherë bashkë me rroba. Por kush do t’i gjykojë ata njerëz? A do t’i gjykojë Gjykata Speciale? Jo! A do të mbesin ata të lirë? Po! Kjo është e padrejtë për popullin e Kosovës. Kjo ka qenë arsyeja pse Vetëvendosja jo vetëm që ka votuar kundër Speciales në vitin 2015, por ne kemi bërë kogja luftë të rreptë për të mos u votuar, mirëpo ajo u votua me insistimin e Hashim Thaçit. Tash, Thaçi bashkësisë ndërkombëtare ia ka dhënë premtimin në emër të atyre votave që kjo është mirë, dhe deputetëve të tij të PDK-së i ka bindur për të ngritur dorën, duke thënë se ne duhet të pastrohemi. Pasi i ka bindur ata që duhet të ketë pastrim, le të shkon të pastrohet. Argumentin e VV-së nuk e ka dëgjuar, madje na arrestojke në atë kohë me policinë e vet. Deputetëve të PDK-së ua “dredhojke” dorën që ta votojnë Gjykatën Speciale dhe popullit i thoshte se duhet të pastrohet emri i UÇK-së.
“Bota sot”: Pse mendoni se tentuan ta shfuqizojnë këtë Gjykatë në fund të vitit 2017?
Glauk Konjufca: Unë mendojë që këta kanë dashur ta bëjnë atë veprim, për arsye se këta kanë menduar që ia dalin të negociojnë me faktorin ndërkombëtar për gjykatën. Këta nuk e dinin se për gjykata nuk negociohet. Gjykata nuk është punë pazari. Kur themelohet një gjykatë, ajo e vendos vetëm fushëveprimin e krimeve që e ka plan t’i ndjek. Gjykata Speciale thotë se di t’i hetojë krimet e pretenduara nga pjesëtarë të UÇK-së, prej janarit të vitit 1998 deri më 31 dhjetor 2000. Kështu që, gjykata i heton dhe i gjykon të gjithë pa dallim. Këta krerët e lartë kanë menduar, sidomos presidenti Thaçi, që negociojnë me faktorin ndërkombëtar dhe në fund atje shkojnë disa ushtarë të thjeshtë të UÇK-së. Kur e kanë parë që kjo punë nuk ndalet deri te ai, e kanë ndërruar qëndrimin për Gjykatën Speciale, duke thënë se tash nuk paska nevojë të pastrohet UÇK-ja dhe është Gjykatë shumë e rrezikshme. Domethënë në 2015-ën ishte për t’u pastruar, e në 2017-ën jo dhe se ishte shumë e rrezikshme për Kosovën. Qëndrimet e tij variojnë varësisht se sa është i rrezikuar ai si individë, pra qëndrimet e tij politike, ai i shikon përmes qenies së tij individuale politike, nëse gjykata ka plan ta hetojë atë, atëherë gjykata shndërrohet menjëherë në një gjë të keqe. Në vitin 2015 thoshte se duhet formuar patjetër këtë gjykatë, përndryshe e formon OKB-ja, për të cilën thoshte se e formon Rusia, e tutje theksonte se më mirë ta formojë Amerika. Në rregull, e krijoi Amerika, madje kryeprokurori amerikan është. Presidenti na ka mësuar që amerikanët janë miqtë tanë. Z. Jack Smith është amerikan dhe ai ia ka ngrit z. Thaçit aktakuzën.
Ndërsa për postin e presidentit, me këto figura politike, ku secilit i duket vetja president, ky presidenti gjasat më të mëdha i ka të na dërgojë në zgjedhje, sepse secili më president se tjetri po del. Në këtë kuptim duke qenë se secili është më president se tjetri, duhet njëra prej tri palëve këtu të lëshojë pe. Ose hiqet Avdullah Hoti si kryeministër, LDK-ja e bën kompromisin me Avdullah Hotin, ose Ramush Haradinaj tërhiqet dhe mbetet pushteti i LDK-së me 3-4 ministra dhe asistentë dhe ai mbetet vet jashtë politikës, ose PDK-ja e ngrit dorën për Haradinajn sikur t’ia ketë borxh, gjë që nuk është rasti. Njëra prej këtyre varianteve duhet të ndodh, për mos të shkuar në zgjedhje. Unë besojë se asnjëra prej këtyre nuk do të ndodh, sepse nëse LDK-ja heq dorë prej kryeministrit, kjo do të ishte më shumë se vetëvrasje. Nëse PDK-ja e ngrit dorën për Haradinajn prej opozitës për ta votuar presidentin e partisë së pestë në Kosovë, kjo nuk ndodh askund në botë, është irracionale. Kjo nuk ndodh, ose nëse ndodh, kjo për PDK-në është me ia dhënë vetes një boks. Mund të ndodh edhe që Ramushi pasi e ka shpallë kandidaturën tërhiqet dhe duhet t’ia votojë një president PDK-së. Por pse t’ia votojnë PDK-së presidentin? Ky është në pushtet. Këta e kanë shumicën në qeveri dhe pa Ramushin nuk bëhet presidenti asesi, Vetëvendosja nuk hyn në pazare. Pa Ramushin i kanë 75 deputetë, ndërsa ai është faktori vendimtar. Çka ka arsye të tërhiqet Haradinaj? Nëse tërhiqet ai, edhe ai i bie një shuplak vetes. Pra, nëse i marrim këta tre parametra dhe njëri prej tyre duhet të ndodh që të zgjedhet presidenti, unë mendojë që secila është shumë e vështirë dhe shpresojë që të ketë zgjedhje të reja në Kosovë, e ky do të ishte lajm i mirë për vendin tonë. Mendoj se populli i Kosovës do ta hiqte qafe një kryeministër shumë të dobët e servil dhe do ta sjellë një qeveri të cilës iu ndërpre mandati në mënyrë të padrejtë.
“Bota sot”: Vendimin tënd sa ishit ministër i Punëve të Jashtme, për kthimin e ambasadorëve politikë të cilët kanë hyrë në mandatin e dytë, e anuloi qeveria Hoti. Si e komentoni këtë?
Glauk Konjufca: Kjo është gatishmëri, është indikacion që e shpërfaqë gatishmërinë e ministres aktuale, për dëgjueshmërinë ndaj presidentit dhe pazareve me të, se siç dihet ata ambasadorë të cilët unë kam vendosur t’i kthejë, janë kryesisht të PDK-së dhe janë të dërguar politik. Ata kanë qenë të dërguar politik nga Hashim Thaçi prej vitit 2015, ku disa në mënyrë të paligjshme kanë hyrë edhe në vitin e pestë. Për atë i kam kthyer shumicën prej tyre. Kështu që duke qenë se janë të tillë, atëherë e kemi parasysh që neutralizimi i veprimit tim nga ana e ministres aktuale të MPJ-së, tregon se ajo është e gatshme për negociata, e këto të fundit në këtë rast do të ishin shkelje të ligjit, sepse unë jam bazuar fortë në ligjin. Unë e kam gjetur nenin e saktë të ligjit, i cili thotë se të dërguarit politik, nuk mund ta bëjnë mandatin e dytë. E kanë një mandat, e mandati është katër vjeçar. Ka atje ambasadorë të vitit 2015 dhe kjo nuk lejohet në asnjë mënyrë. E nëse tash vazhdon të pajtohesh me presidentin për t’i vazhduar mandatet, kjo është kompromis që presidentit me ia lënë hapësirat e tij në diplomaci dhe politikë të jashtme. Kjo tregon më së miri se kush ka qenë “msiti” kryesor, pra kush ka qenë “msit” i kësaj qeverie aktuale. Kur po them se Thaçi e ka krijuar këtë qeverinë aktuale, të gjitha këto që ndodhin në çdo ministri, duke ia lënë Thaçit duart e lira, si në diplomaci në këtë rast, që unë ia shkurtojsha ato hapësira, tash Meliza Haradinaj detyrohet t’ia lë ato hapësira, tregon kush ka qenë “msiti” kryesor për formimin e qeverisë Hoti.
