Shukri Buja tregon se pse e liroi nga burgu i UÇK-së më 1999 një serb

Intervista

Shukri Buja tregon se pse e liroi nga burgu i UÇK-së më 1999 një serb

Diana Bunjaku Nga Diana Bunjaku Më 14 shkurt 2017 Në ora: 16:00
Deputeti i Partisë Demokratike të Kosovës Shukri Buja

Deputeti i Partisë Demokratike të Kosovës Shukri Buja, në një intervistë ekskluzive për gazetën “Bota sot”, ka treguar se përse e ka amnistuar Hashim Thaçin nga meritat për  ndaljen e trenit serb. Sipas tij, ishin ndërhyrjet e BE –së, ato që çuan në ndaljen e trenit. Më tej ai ka treguar edhe marrëdhënien e tij me zyrtarin policor Nehat Thaçin, për të cilin me herët, Buja, kishte deklaruar se Thaçi kishte gënjyer në lidhje me pjesëmarrjen në UÇK. Gjithashtu ai ka folur edhe për hetimet ndaj tij, për fshehje të pasurisë, për  “pushtimin” e politikës me njerëz me aktakuza për korrupsion si dhe për Gjykatën Speciale dhe njerëzit e partitë që ajo prek. Buja, është shprehur pro vazhdimit të dialogut me Serbinë, duke kundërshtuar kështu qëndrimin e Opozitës.

Bota Sot: Ju keni hedhur poshtë, deklaratën e Hashim Thaçit se trenin e  ndali ai. Perse?

Shukri Buja: Realisht unë nuk e kam hedhur poshtë deklaratën e Hashim Thaçit apo të ndonjë personaliteti të Kosovës, por unë e kam dhënë realitetin politik që ka ndodhur në këtë rast. Treni u ndal në Rashkë nuk është ndalur në kufi me Kosovën, prandaj kam theksuar faktorët që ndikuan në ndaljen e trenit. E faktorët që kanë ndikuar janë institucionet e Kosovës që morën vendime kushtetutore , janë intervenimet e BE-së, përmes përfaqësuesve të saj, dhe faktorët tjerë, siç është përfolur për Erdoganin dhe përfaqësues të shtetit Amerikan dhe shumë faktorë tjerë që ndikuan për tu ndalë treni. Pra nuk e ndalën Institucionet e Kosovës, në ndaljen e tij por  vetëm kanë ndikuar. 

Bota Sot: Gjatë kohës së arrestimit, zyrtari i  lartë i policisë së Kosovës, Nehat Thaçi u deklarua në Gjykatë se nuk kishte qenë pjesë e UÇK -së, ndërkohë ju ne Kuvendin e Kosovës, u deklaruat se Thaçi ka gënjyer. Si ta kujtojmë këtë reagim tuajin?

Shukri Buja: Unë nuk kam thënë se Thaçi, ka gënjyer në lidhje me këtë çështje  rreth deklaratës të zyrtarit të lartë të policisë së Kosovës, Nehat Thaçi , sepse në këtë rast mund të shihni edhe transkriptin në Kuvendin e Kosovë. Por, unë kam theksuar një çështje që ka qenë reale se z. Thaçi ka qenë ushtar i UÇK-së. ndërsa mbrojtja, e tij ka pretenduar se mund ta mbrojë përmes asaj, duke e mohuar se ka qenë ushtar i UÇK-së. Me z. Thaçi pas çlirimit kemi komunikuar dhe ai është falënderuar për mbrojtjen e dinjitetit të tij si ushtar i UÇK-së.

Bota Sot: Çfarë ka ndodhur me hetimet ndaj jush për fshehje te pasurisë?

Shukri Buja: Nuk ka qenë për fshehje të pasurisë, por ka qenë për mos deklarim të pasurisë, pasi deklarimi i pasurisë ka ndodhur për tri ditë, pra deklarimi i pasurisë ka ndodhur për tri ditë, pra, ka qenë në pyetje edhe aspekti ligjorë, pasi unë kam deklaruar  pasurinë 3 ditë para afatit ligjor duke menduar, se do të duhej të dorëzohej pasuria në momentet që dorëzohet detyra e kryetarit dhe pikërisht për këtë jam dënuar me gjobë (mjete financiare) dhe katër muaj me kusht, të cilat i kam kryer. 

Bota Sot: Ndërmarrja Publike Banesore ka ngritur një padi ndaj jush sa ishit kryetar i Lipjanit, për uzurpimin e një banese në lagjen “Dardania” të Prishtinës. Po me këtë rast çfarë ka ndodhur?

Shukri Buja: Realisht kjo ka qenë më shumë politike se sa diçka tjetër. Kanë para disa regjistra të banës blerësve. Unë e kam pas të blerë banesën në këtë Ndërmarrje Publike Banesore, aty ku kanë pretenduar se e kam uzurpuar, dhe me marrëveshjen e kësaj ndërmarrje kam bërë ndërrimin e banesës dhe e kam bërë pagesën e banesës aty ku jam. Në atë banesë nuk e di kush ka qenë dhe unë jam detyruar të shkoj dhe ta identifikojë dhe të shoh personin që ka qenë në atë banesë për ta njoftuar më gjerësisht Ndërmarrjen Publike Banesore, por, ai njeri pretendon që e ka kontratën me këtë ndërmarrje. Por , me rëndësi është se unë e kam qartësuar, se unë nuk kam të bëj me atë bae4së por ta kërkojë Gjykata apo ndërmarrja ku është adresa e vërtetë.

Bota Sot: Në vitin 2012, Nazim Bllaca iu ka akuzuar juve për lidhjet me serbët. Në një reagim të publikuar në media ai iu ka pyetur,  se si u bë që ju keni liruar nga burgu i UÇK-së një serb, prindi i të cilit ju kishte liruar juve nga burgu serb në vitin 1994. Çfarë mund të na tregoni për këtë rast?

Shukri Buja: Realisht, unë kam qenë i dënuar me 13 vite burg, në shkallën e parë në vitin 1989, dhe sipas ndryshimeve që ndodhën në Kosovë edhe vetë gjykatësit të cilët ishin në shërbim, të sistemit të Millosheviçit në atë kohë, kanë reflektuar dhe nga dënimi prej 13 viteve, më është zbritur në 9 vite dhe më është hequr neni 132, i cili ka qenë për terrorizëm dhe kanë zbritur në 9 vite. Dhe kjo më ka mundësuar që të përfitojë edhe nga amnistimi që është dhënë për të gjithë të burgosurit politik në atë kohë. Pra, dy amnistitë që i dha federata Jugosllave në atë kohë për të gjithë të burgosurit në përgjithësi pavarësisht veprave, pasi ka qenë falja për ¼ e burgut dhe ka qenë amnistimi i kryetarit të atëhershëm të ish Jugosllavisë z. Stipe Mesiq, i cili për të burgosurit pati dhënë nga dy vite amnisti. Dhe unë kam mbajtur 5 vite burg në Nish, dhe kjo nuk ka të bëj me lirimin e qytetarëve serb, por zakonisht gjatë luftës aty ku e kam parë se ka tendenca marrje pa ndonjë fakt, të ndonjë pjesëtari qoftë të komuniteti serb apo shqiptar atëherë normalisht, se kam intervenuar që të mos bëhen shkelje të rregulloreve të UÇK-së.

Bota Sot: Pse mendoni se Gjykata Speciale do të dëmtojë PDK -në?

Shukri Buja: Gjykata Speciale mund ta dëmtojë PDK-në, por, mund t’i dëmtojë edhe partitë tjera politike, por Gjykata Speciale do të provojë, por nuk mendoj se do të ketë dëme në aspektin e partive politike, pasi njerëzit janë të përcaktuar për partitë politikë dhe Gjykata Speciale, nuk do të ndikojë tek përcaktimi i tyre politik.

Bota Sot: A keni ju informacioni për njerëzit që do të hetojë Specialja?

Shukri Buja: Realisht, nuk po mundet të jap informacione as vetë prokurori i Gjykatës Speciale dhe nuk kemi mundësi të japim ndonjë information, sepse nuk kemi informacione në media dhe në opinion po flitet për shumë emra mirëpo ato janë të gjitha supozime dhe asgjë nuk ka të bëj me ndonjë informacion të sigurtë.

Bota Sot: Në fushatën e parazgjedhore të Drenasit, u pa që PDK -ja, është e ndarë në dy kampe, mes Kadri Veselit dhe Hashim Thaçit. Ju në cilën anë qëndroni?

Shukri Buja: Realisht, unë nuk shoh ndarje kampesh, pasi Hashim Thaçi është në Presidencë dhe nuk ka të bëj me PDK. Dihet, se ai është një njeri që ka dhënë dorëheqje nga posti brenda Partisë Demokratike të Kosovës dhe nuk është anëtar i partisë Demokratikë të Kosovës. Tani PDK-në, e udhëheq Kadri Veseli mund të ketë simpati brenda partisë për njërin apo tjetrin më shumë apo më pak, por në aspektin programor jemi bashkë. 

Bota Sot: Pse në politikë po lejohen njerëz të inkriminuar dhe të korruptuar?

Shuri Buja: Duhet ta kemi parasysh ligjin që është në fuqi. Ligji nuk e bën askënd fajtorë. Pse ngrihet  një aktakuzë, fajësie përcaktohet nga Gjykata. Derisa të përcaktohet fajësia, ai njeri është i pafajshëm prandaj edhe këtu është dilema dhe duhet merren masa, para se të shpallet fajësia apo të mos lejohen të kandidohen apo të jenë në politikë, apo pasi të fajësohen në bazë të ligjit. Realisht duhet të veprohet sipas ligjit ose duhet të veprohet për t’u ndryshuar ligji dhe për të paraparë brenda ligjit sanksionet që duhen marrë për të korruptuarit apo për ata që dyshohet që janë të korruptuar dhe  të inkriminuar. 

Bota Sot: Pse sipas jush nuk bëheshin publike financat e partive politike? Kush e financon PDK-në?

Shukri Buja: Këtë çështje e ka sektori i financave, dhe unë nuk kam të bëj me financat e Partisë Demokratike, por dihet që partitë më së shumti  financa marrin nga Parlamenti apo Kuvendi i Kosovës dhe secili prej tyre e ka të përcaktuar me ligj shumën mbajtëse të forcës politike që e ka brenda paralamentit.

Bota Sot:  Z. Buja meqë kohëve të fundit po përflitet shumë për ndërprerjen e dialogut me Serbinë, a mendoni ju se duhet të vazhdojë ky dialog?

Shukri Buja: Kam thënë edhe më parë se dialogu ndodh gjithmonë edhe gjatë konfliktit me shumë shtete, por edhe pas konfliktit të armatosur gjithmonë përfundohet me dialog apo me marrëveshje. Dhe dialogu nuk ka logjikë  të ndërpritet por, forma e dialogut duhet të ndryshojë dhe strategjia jonë duhet të ndryshojë në këtë dialog dhe gjithsesi duhet të përcaktohet agjenda me temat që duhet të bisedohet për çështjet e Kosovës, për çështjet e dy shteteve  e jo të dialogohet për çështje të brendshme të Kosovës.  

Bota Sot: Opozita është duke kërkuar me ngulm ndërprerjen e dialogut si pasojë e tentim-agresionit, nëpërmjet trenit dhe ndalimit të Ramush Haradinajt në Francë me fletarrestim të Beogradit. Janë këto motive të bollshme për ta ndërprerë dialogun?

Shukri Buja: Është në natyrën e çdo opozite dhe jo vetëm në Kosovë që të reagojë për veprimet e pozitës, të gjej hapësirë për të reaguar dhe për të motivuar politikisht për të ardhur në pushtet por,  dialogu është i detyruar edhe nëse ata janë në pushtet.  Pasi  duhet të dialogohet, jo për shkak të shantazheve apo kërcënimeve, por për shkak të mirës së shtetit. Duhet  të dialogohet jo vetëm me Serbinë por edhe me shtetet fqinje por gjithmonë  në  dialog  duhet të flitet ndërtimin e asaj që na tregon që jemi shtet, apo që i tregon partnerit që ne jemi shtet dhe duhet të bisedohet për gjërat, të cilat janë në interes të Kosovës.

Bota Sot: Tashmë është bërë aktuale edhe çështja e Gjykatës Speciale. Populli është në ankth, se kush do të ballafaqohet me këtë gjykatë. Besoni në paanshmërinë e kësaj Gjykate?

Shukri Buja: Fillimisht duhet të merremi me atë se si u krijua Gjykata Speciale, sepse shumë flasin se në Kosovë nuk veproi drejtësia, apo që nuk patëm drejtësi që ka mundur të merret me këto raste. Por dua ta rikujtoj se në Kosovë ka ndodhur më së shumti ndjekje sesa çdo shtet tjetër ku ka qenë konflikti i pjesëtarëve dhe eprorëve të UÇK-së. Madje, nuk ka asnjë zonë ku nuk janë burgos dhe nuk janë hetuar e ndjekur eprorët e UÇK-së dhe ushtarët e saj. Dhe po ti krahasojmë me eprorët dhe politikanët serb më shumë ka Kosova sesa Serbia, më shumë ka Kosova se Kroacia dhe më shumë ka Kosova sesa Bosnja. Për këtë është krijuar kjo Gjykatë. për trajtim regjional, për trajtim të shteteve që kanë qenë në konflikt me insistimin e Rusisë dhe Serbisë, për të pajtuar të nesërmen në politikat globale. Realisht, kjo Gjykatë e ka bazën politike, është formuar me presion politik, nga një institucion politik dhe pak mund të besohet se nuk do të këtë ndikim të politikave në këtë gjykatë.

Bota Sot:  Të gjithë janë deklaruar se Gjyka Speciale,  është themeluar vetëm për shqiptarët. Mendoni se kjo është gjykata e fundit me të cilën do të ballafaqohet populli shqiptar?

Shukri Buja: Thashë edhe me herët, se kjo gjykatë e ka bazën politike, është e njëanshme e krijuar vetëm për shqiptaret apo vetëm për ushtaret e UÇK-së dhe ndjekjen e saj dhe do të jetë e dëmshme për Kosovën, sado që shumica e politikanëve edhe të spektrit politik të cilit unë i përkas thonë, se do të pastrohet lufta e UÇK-së. Por, në fakt kjo Gjykatë do të jetë e dëmshme për Kosovën dhe do të jetë një Gjykatë, e cila nuk ka ndodhur në asnjë shtet të botës, që të jetë e njëanshme. Krimet janë krime, pavarësisht se kush i ka bërë, dhe duhet të ndiqen si krime, por të krijohet një Gjykatë, duke i veçuar popujt apo komunitet, kjo po ndodh vetëm në Kosovë.

Bota Sot:  Ka edhe tjera telashe për Kosovën. E papërfunduar ka mbetur edhe çështja e Demarkacionit me Malin e Zi. Kush ka të drejtë në këtë rast, Pozita apo Opozita?

Shukri Buja: Në këtë rast nuk ka të drejtë as Pozita e as Opozita. Realisht  të dyja janë betonuar me qëndrimet e tyre dhe kjo është e dëmshme. Ne nuk jemi betonuar në qëndrimet tona me Serbinë ,kurse mes veti po betonohemi. Dihet që problemet rreth demarkimit të kufirit kanë edhe Mali i Zi me Serbinë , kanë Kroacia me Serbinë, Kroacia me Slloveninë, por i kanë zgjedhur deri diku problemet duke i lënë hapur për bisedime çështjet të cilat i kanë kontestuar. Dhe ne kemi mundur ta zgjidhim këtë çështje, sepse 90 % e vijës kufitare nuk ka kontekste, janë dy kuota të cilat kanë probleme dhe opozita i konteston dhe kemi mundur ta aprovojmë me 90 % të vijës kufitare me Malin e Zi, ndërsa ta lëmë hapur çështjen për bisedime të dy kuotave, 5të cilat janë apo nuk janë apo nuk janë 8 mijë e 200 hektarë që po humbim këtu në Kosovë.    

Bota Sot: Kosova duhet të kalojë edhe Asociacionin e komunave me shumicë serbe. Mendoni se do të kalojë ky Asociacion?

Shukri Buja: Me këtë Kuvend që kemi nuk e besoj, se Kosova do të kalojë Asociacioni i komunave me shumicë serbe. Po  ashtu mendoj, që nuk kalon as Demarkacioni në asnjërën formë. Sepse, po shihet shumë mirë që Kuvendi nuk po mundet me u konsultu, siç duhet në kuptimin e mbetjeve të takimeve apo të ketë numër të nevojshëm, sipas asaj që është pozita apo sipas koalicionit që e ka pozita. Realisht, ne nuk po arrijmë që as 60 deputetë të jemi në Kuvend, në mbledhje dhe këto  të dyja kërkojnë shumë më shumë apo 2 të 3-ve të Kuvendit dhe nuk mendoj, që ky Kuvend ka hapësirë që t’i kalojë këto dy çështje. E çështja e Asociacionit dihet se është një çështje e ndërlidhur me vendimet edhe të Gjykatës Kushtetuese, e cila ka kontestuar marrëveshjen e ministrit të tashëm në Bruksel në 12 pika. Duhet  të kemi kujdes dhe mendoj që Asociacioni me këtë Kuvend nuk mund të kalojë ashtu siç nuk do të mund të kalojë as Demarkacioni. 

Bota Sot: Z. Buja, sapo thatë që me këtë Kuvend që kemi, nuk mund të kalojë as Asociacioni e as Demarkacioni. Atëherë çfarë duhet të bëjmë sipas jush?

Shukri Buja: Ka disa muaj apo prej që jam deputet, kam filluar të loboj dhe të jem publik në zgjedhjet e jashtëzakonshme, për shkak se po të mos isha deputet nuk do të cenohej interesi im personal. Kurse tani si deputet e kam shumë më lehtë, sepse shihet se nuk është në pyetje se a do të jem deputet apo s’do të jem, a do të vazhdojë punën me marr një rrogë apo jo, por çështja e interesit të shtetit është shumë më e lartë, dhe interesi shtetëror i Kosovës e do që  ne ta bëjmë një Kuvend pas zgjedhjeve të reja një Kuvend funksional. Nuk flas se cila parti do të fitojë apo do të humbë,  por konstrukti i Kuvendit duhet të ndryshojë edhe nga vetë partitë që janë sot në pushtet dhe të vijnë të rinjtë të cilët kanë kreativitet kanë energji, dhe kanë mundësi për të mundur  që të  merren  vesh dhe të thyhet kjo ndarje shumë e rrezikshme mes Pozitës dhe Opozitës .

Bota Sot: Të gjitha që i përmenda më lart në njëfarë mënyre janë kushte që Kosovës t’i hapën dyert e integrimeve. Duke i parë zhvillimet politike në vend dhe kushtëzimet ndërkombëtare, a do ta marrë Kosova liberalizimin e vizave?

Shukri Buja: Njëra nga çështjet të cilat, po e pëson populli i Kosovës, apo qytetarët e saj, është liberalizmi i vizave. Ne, sa më shpejt që ti mbajmë zgjedhjet dhe ta bëjmë një Kuvend ,ashtu siç duhet dhe të kemi njerëz të rijnë që kanë mundësi të merren vesh mes veti, pozitë dhe opozitë ta kalojnë Demarkacionin atëherë do të kemi gjëra më të mira për qytetarët sepse do të kemi liberalizim të vizave. Unë nuk besoj, se me këtë Kuvend dhe me këtë ndarje të partive politike në ekstrem që ka ndodhur në këtë legjislaturë , mund të kalojë demarkacionin dhe të kemi liberalizim të vizave.

Bota Sot: Dihet se ka pasur deklarime të diplomatëve ndërkombëtarë se ka rrezik që të rindizet serish lufta Kosovë-Serbi. Si i komentoni ju këto deklarata?

Shukri Buja: Unë dal me deklarata kur është koha, sepse unë jam munduar që t’i bind deputetët edhe të PDK-së edhe të partive tjera që ne duhet të planifikojmë buxhetin për Forcën e Sigurisë të Kosovës, pavarësisht se çfarë emri ka, në mënyrë që të kemi një stabilitet në mbrojtje të vendit për shkak të rrezikshmërisë, të lëvizjeve së faktorëve gjeopolitikë, sidomos insistimit i Rusisë pas tendencave për pranimin e Malit të Zi, në kuadër të forcave të NATO-s.  Deklarimet    e Putinit rreth çështjes së Malit të Zi, pastaj janë lëvizjet e armatimit në Kroaci dhe në Serbi, lëvizjet apo përfundimi i konfliktit në Siri, që nënkuptojnë mundësitë e konfliktit të ri diku tjetër, që më i afërt është Mali i Zi e Kosova , me të cilin  kemi një vijë ndarëse në aspektin gjeostrategjik Kroaci (pjesa e kroatëve të Bosnjës). Dhe këtu mund të kemi çdo moment luftë, nëse jo drejtpërdrejt  luftë frontale, atëherë në gjithë këtë vijë mund të kemi çdo moment luftime sporadike.

Bota Sot: Në një shtet pa stabilitet gjithçka është e mundur, por më intereson mendimi i juaj, nëse është e mundur që sivjet të kemi edhe zgjedhje parlamentare?

Shukri Buja: T’ju them të drejtën unë po insistoj të kemi zgjedhje parlamentare dhe besoj shumë që muaji maj, apo ma i largëti të jetë qershori, ku do ti kemi zgjedhjet parlamentare dhe lokale bashkë. Janë shumë arsye për këtë, sepse përveç atyre që potencova se kuvendi është jo nën nivelin e duhur, për ti ka kaluar proceset të cilat i ka Kosova të domosdoshme dhe koalicioni po shihet se është jo funksional sa duhet qeverinë e kam quajtur qeveri me paterica. Dhe duke i parë këto, kam menduar se mund ti mbajmë zgjedhjet lokale bashkë që mos të kemi shpenzime të mëdha , gjatë zgjedhjeve por ti mbajmë me një fond të përbashkët sepse edhe ashtu i kemi zgjedhjet lokale. Ka mundësi ligjore për shkak se 6 muaj para skadimit të mandatit të kuvendeve komunale ka mundësi që Presidenti të shpall zgjedhjet, dhe po ashtu partitë e mëdha politike janë të interesuara për shkak se ka shumë dhe pretendentë për shumë poste, dhe atëherë do të mund të shpërndahen, disa të jenë për kryetar të komunave, disa për asamble, disa për parlament dhe disa pretendues për ekzekutimin e vendit dhe kështu unë e quaj se mbushin shumë vrima brenda partive të veta të vendit. Dhe kemi  mundësi që në muajin maj apo qershor ti kemi dy palë zgjedhje.

Bota Sot: A mendoni se këto zgjedhje do të jenë në dobi të qytetarëve apo ata do ta humbin besimin tek politikanët e vendit?

Shukri Buja: Unë po shpresoj,  që edhe parlamentin e kanë përcjell shumica e qytetarëve edhe rrjedhat në Kosovë dhe mund të vlerësojnë vetë, se kush do të jetë brenda parlamentit të Kosovës, në mënyrë që edhe brenda partive politike të ketë ndryshime. Disa   emra të ndryshuar,  disa deputetë të vijnë të ri, të cilët mund të komunikojnë në mes veti partitë politike, në mënyrë që ti kalojmë disa procese. Sepse këta deputet që janë sot në Parlament kanë krijuar atë largësi mes veti, sidomos  opozitë- pozitë,  nuk po mund të komunikojnë për të nxjerrë një rezolutë e cila do të ishte në dobi të lirimit z. Haradinaj. Dhe nuk arritëm të pajtohemi për një rezolutë të përbashkët në këtë rast e më së largu për çështje më madhore apo më konfrontuese. Prandaj, për këtë na duhet një konfiguracion tjetër i parlamentit dhe brenda partive politike. Po  shpresoj, që do të ketë ndryshime të emrave nëqoftëse  jo ndryshime të konstulacionit të forcave brenda parlamentit. 

Bota Sot: Z. Buja meqë e përmendët rastin e z. Haradinaj a mendoni se politika e Kosovës, nuk ka bërë edhe aq sa duhet, për të mos ardhur deri tek ky arrestim? 

Shukri Buja: Politika e Kosovës nuk po mund të funksionojë si shtet, sepse diplomacia e saj nuk është nën nivelin si shtet. Ministria e Punëve të Jashtme me gjithë angazhimin e saj nuk arrin që të bëjë, ato që duhen bërë për çështjen e flet arresteve. Ministria e Drejtësisë edhe me ndërrimet që ndodhen edhe me veprimet që po ndodhin dhe nuk është në gjendje të ndikojë deri në atë masë,  sa me ia ndalë hovin Serbisë. Serbia fletarrestet, po i aktivizon, kur po dëshiron.  Është  folur, jo i ka 20 jo 22 fletarreste e në fakt Serbia i ka 157 në listë dhe i aktivizon kur të dojë,  ajo në Interpol. Dhe në qoftë se para tre muajve i ka aktivizuar  20 mbas një muaji nëse veç është në interesin e saj politik i aktivizon 30 tjerë. Pra, kur t’ia dojë qejfi po i aktivizon. Unë jam përballë me fletarreste nga Serbia nga viti 2004, por, Serbia vetë i ka ndërpre këto fletarreste me Interpol për një herëe pastaj i ka riaktivizuar sërish. Pra, realisht ajo po luan një lojë, sepse kur po do po i ndërpren ato dhe kur do,  po i aktivizon sipas interesave të saja politike.

Bota Sot:  Nëse do të mbahen zgjedhjet lokale siç thatë edhe më parë, atëherë cila parti mendoni se do t’i fitojë këto zgjedhje?

Shukri Buja: Unë po të mos isha i sigurtë, se PDK-ja i fiton zgjedhjet nuk kisha insistuar kaq shumë që të mbahen zgjedhjet. Për mua është e palogjikshme insistimi i opozitës për të mbajtur zgjedhje përderisa e din mirë që nuk kanë arrite të kthejnë vëmendjen e votuesve atyre që nuk kanë votuar fare dhe votuesve të  partive tjera nga vetvetja. Pastaj edhe  konstulacioni i forcave brenda në Parlament është shumë vështirë  të ndryshohet, mund të këtë ndonjë ndryshim të vogël, por PDK –ja,  jam i bindur se do të dalë e para. Dhe sa më shumë që mund të vonohemi, aq më shumë mund të shkojmë drejt zvogëlimit të përqindjes që e kemi pasur./BS/

Sot mund të lexoni Shfletoni kopertinat