Ministria e Tregtisë dhe Industrisë, gjegjësisht Agjencia për Investime dhe Përkrahje të Ndërmarrjeve në Kosovë (KIESA), ka shpallur sot Top Ndërmarrjet e Vitit 2018.
Edhe këtë herë, mirënjohjet janë ndarë për kategorinë e ndërmarrjeve të vogla dhe të mesme, për 21 kompani nga shtatë regjione të Kosovës.
Mirënjohjet u ndanë nga ministri i Tregtisë Endrit Shala. Ai tha se një gjë ë tillë organizohet në përkrahje të bizneseve për punën dhe angazhimin e tyre.
Shala: Mirënjohjet e sotme simbolikë për kontributin e bizneseve në shoqëri
“Kjo është vetëm një simbolike krahasuar më atë që meriton biznesi jonë. Shpërndarja e këtyre mirënjohjeve nga ana e MTI-së është kontribut i asaj që ju keni dhënë në mirëqenien e vendit tonë, për punësimin, për një teknologji më të mirë, inovacion dhe për përgjegjësisë tuaj ndaj shoqërisë”, tha ai.
Me këtë rast, ministri Shala pati një premtim për bizneset.
Shala: Do t’i mbështesim bizneset në kërkesat e tyre
“MTI çdo herë do të jetë përkrahë bizneseve dhe do të avokojë në zgjedhjen e problemeve të tyre si tek institucionet vendore dhe ato ndërkombëtare”, u shpreh ministri.
Ndërsa drejtori i KIESA-s, Nol Buzhala, bëri të ditur procesin si zgjidhen ndërmarrjet më të mira.
Buzhala: Përfillim një numër kriteresh për përzgjedhjen e top ndërmarrjeve
“Ne nuk kemi ndonjë shpallje apo ndonjë konkurs që me apliku ju që të jeni pjesë përfituese e ndërmarrjeve më të mira të rajonit tonë. Ne në mënyrë selektive i kërkojmë të dhënat fillimisht nga trusti pensional i Kosovës, ku aty e marrim punësimin e juaj që e keni bërë në krahasim ndërmjet viteve 2017 dhe 2016 dhe pikëzimi që bëhet aty në diferencën e punësimit iu ngrit juve më lart. Pas asaj ne marrim të dhënat nga Administrata Tatimore e krahasojmë kontributin e juaj që keni dhënë ATK-së krahasuar nga viti në vit. Po ashtu, këto të dhëna i marrim edhe në Doganën e Kosovës duke krahasuar eksportet e juaja apo importet në përgjithësi”, tha ai.
Ministri ka treguar se në kuadër të MTI-së përmes njësisë së saj, Agjencisë KIESA zhvillohen edhe disa projekte tjera që përkrahin fuqizimin e prodhimit vendor.
Shala përmendi veprimtaritë që do të përkrahen nga MTI-KIESA:
- subvencionimit të makinerive prodhuese,
- skemat për certifikim të produkteve, përmes se cilave produktet e bizneseve do të certifikohen dhe të pranohen ndërkombëtarisht, gjatë vitit 2019 kjo do të përkrahet nga projekti i Bankës Botërore
- skemat për këshillim, po ashtu edhe kjo gjatë vitit 2019 kjo do të përkrahet nga projekti i Bankës Botërore.
- organizimin e panaireve kombëtare dhe ndërkombëtare, ku ju ofrohet kompanive tonë pjesëmarrja në to dhe ekspozimi i produkteve të tyre në tregjet evropian dhe me gjerë.
- ofrimi i parcelave në kuadër të zonave ekonomike për një periudhë 99 vjeçare, si dhe shumë e shumë aktivitet tjera.
Ministri Shala i ka inkurajuar bizneset që t’i përcjellin aktivitetet e MTI-së dhe të aplikojnë për te qenë pjesë e tyre.
Ndërsa top ndërmarrjet e regjionit të Prishtinës ishin: top ndërmarrja mikro “GREATWOOD” L.L.C, ndërmarrja e vogël “EUROFRUTI” Sh.P.K., dhe top ndërmarrja e mesme “PANPAN” Sh.P.K. Në të njëjtën metodë, MTI ka zgjedhur top ndërmarrjet edhe në regjionin e Gjilanit, Ferizajt, Prizrenit, Gjakovës, Pejës dhe Mitrovicës.
