Përmes një statusi në rrjetin social Facebook të QKUK-së, kanë shkruar se një ekip nga Suedia, i përberë nga kirurgë plastikë dhe anesteziologë, po qëndrojnë në QKUK dhe po trajtojnë pacientë.
Qendra Klinike Universitare e Kosovës dhe Qendra Klinike Universitare e Linkoping të Suedisë, kanë një bashkëpunim që ka nisur në 2001, përcjell Bota Sot.
Mjekët nga Suedia do të qëndrojnë në Kosovë deri të premten, kjo qendër universitare ka pasur bashkëpunime edhe me klinika tjera të QKUK-së.
Erkki Torpilla, mjek nga Suedia, ka folur për intervenimet kirurgjike dhe tregoi për aktivitetin e ekipit që drejton ai, me të cilën po qëndron në Kosovë që nga dita e hënë.
Postimi i plotë:
Mjekë nga Suedia, po operojnë pacientë në QKUK
Një ekip mjekësor nga Suedia, i përbërë nga kirurgë plastikë dhe anesteziologë, po qëndrojnë në QKUK dhe po trajtojnë pacientë, në bazë të një bashkëpunimi mes Qendrës Klinike Universitare të Kosovës dhe Qendrës Klinike Universitare të Linkoping të Suedisë, i cili ka nisur më 2001. Bashkë me kirurgët nga Kosova, në Klinikën e Kirurgjisë Plastike, këtë javë, kanë kryer tri operacione mikrokirurgjike, në bazë të planifikimeve të bëra. Drejtori i Kirurgjisë Plastike në QKUK, dr. Zenë Buja, e vlerësoi lartë bashkëpunimin me kirurgët suedezë.
Përveç ndihmës profesionale, Buja tha se Suedia i ka furnizuar edhe me pajisje mjekësore. “Bashkëpunimi me mjekët suedezë daton që nga viti 2001 është një bashkëpunim shumë i mirë, shumë i suksesshëm, për arsye se ky ekip i mjekëve suedezë na ka ndihmuar shumë, si në aspektin e ngritjes sonë profesionale, poashtu na kanë ndihmuar edhe me pajisje mjekësore”, tha Buja.
Erkki Torpilla, mjek nga Suedia, ndërkaq, foli për intervenimet kirurgjike dhe tregoi për aktivitetin e ekipit që drejton ai, me të cilën po qëndron në Kosovë që nga dita e hënë.
“Qëllimi dhe misioni ynë është që të japim përvojat tona, për kolegët tanë kirurgë plastikë. Fillimisht kemi bërë konsultime për vështirësitë rreth rasteve të operimeve plastike. Gjithashtu, kemi bërë shumë vizita dhe kemi dhënë rekomandime për kolegët tanë se si të veprohet ose jo. Kemi kryer operacione ku kemi menduar se ka përfitime në aspektin edukativ”, tha Torpilla.
Mjekët nga Suedia do të qëndrojnë në Kosovë deri ditën e premte. Kjo qendër universitare ka pasur bashkëpunim edhe me klinikat e tjera të QKUK-së.
