Ministri i Zhvillimit Ekonomik, Valdrin Lluka ka nënshkruar sot memorandumin e bashkëpunimit me kryetarin e Komunës së Kamenicës, Qëndron Kastrati, me synim të përmirësimit të ndriçimit publik.
Memorandumi parashikon që MZHE të ofrojë përkrahje prej 67 mijë euro për Komunën e Kamenicës me qëllim të përmirësohet ndriçimi publik, ndërsa Komuna e Kamenicës do të ofrojë 7 mijë euro për këtë projekt.
Me nënshkrimin e këtij memorandumi synohet krijimi i mundësive për implementimin e pilot projektit “Promovimi i Efiçiencës së Energjisë në nivel lokal përmes zbatimit të masave të Efiçiencës së Energjisë”.
Ndryshe, memorandumi i bashkëpunimit është pjesë e zbatimit të Planit Nacional për Efiçiencë të Energjisë, e që kontribuon në përmbushjen e obligimeve të Kosovës ndaj Traktatit të Komunitetit të Energjisë.