Gjatë ditës së sotme në hapësirat e Brigadës së Zjarrfikësve në Mitrovicë, është realizuar ushtrim i përbashkët me zyrtarë policorë të kësaj komune.
Në këtë ushtrim praktik u demonstruan njohuri dhe shkathtësi për përdorimin e mjeteve për fikjen e zjarrit, ku në fokus ishin rastet e zjarreve me përmasa të mëdha në zona të thella malore.
Gjatë këtij ushtrimi të përbashkët zyrtarët policorë u njohën me veprimet bazë, si në aspektin e përdorimit të mjeteve për fikjen e zjarrit, masave mbrojtëse si edhe për bashkëveprim dhe koordinim në bazë të planeve të veprimit në terren në zona ku shfaqen zjarret.
Ky ushtrim i përbashkët synon ngritjen e kapaciteteve në raste emergjente, ndërsa angazhimet e zyrtarëve policorë do të jenë në dispozicion atëherë zjarrfikësit vlerësojnë se kanë nevojë edhe për asistencën policore.
Ushtrimi i përbashkët u vlerësua i frytshëm dhe i domosdoshëm, marrë parasysh faktin se natyra e menaxhimit të situatave me zjarre në përmasa të gjera domosdoshmërisht reflekton nevojën e planifikimeve për një bashkëveprim të ndërsjellë.
