Qytetarët e Hanit të Elezit, vazhdojnë të shqetësohen për shëndetin e tyre. Ata dertin po ia mbajnë mbetjeve të azbestit. E kryetari i kësaj komune thotë se, Ministria e Mjedisit ani pse është munduar ta sanojë gjendjen lidhur me këtë problem, ka shkaktuar veç më shumë dëme.
Mbetjet e azbestit në Hanin e Elezit po rrezikojnë jetën e qytetarëve. Në fakt në këtë komunë ka ekzistuar një fabrikë e cila ka prodhuar gypa ujësjellësi, kanalizimi dhe mbulesa pullazesh për objekte përcjellëse të banimit.
Por edhe pas mbylljes së kësaj fabrike në këtë qytet në numër të madh vërehen mbetjet e tij.
Azbesti gjithashtu ka shkaktuar edhe vdekjen e shume njerëzve në këtë zonë.
Se mbetjet e azbestit paraqesin problem për këta qytetar e thonë edhe në Spitalin e kësaj qyteze.
Madje infermierja Luljeta Cajani, thotë se ky material është shkaktari kryesor i tumorit të mushkërive.
E kjo gjendje ka nxitur edhe reagimin e Avokatit të Popullit.
Madje ata kanë nxjerr një raport ku paraqitet shqetësimi i këtij institucioni.
Avokati i Popullit ka konstatuar se institucionet nuk kanë marrë asnjë masë për sensibilizimin e publikut, për rrezikun që paraqesin mbetjet e azbestit.
Ky institucion vërejtje ka edhe për Ministrinë e Mjedisit.
Ndërkohë, Ministria e Mjedisit është munduar që të sanojë këtë gjendje në Han të Elezit.
Por, Kryetari i Komunës thotë se projekti mbi një milionësh i ministrisë i ka shkaktuar vetëm dëme.
E nga MMPH nuk kanë kthyer përgjigje për këtë çështje, ndonëse T7 ka tentuar disa herë një gjë të tillë.