Kryetari i Kuvendit të Kosovës, Kadri Veseli, bashkë me ministrin e Kulturës, Rinisë dhe Sportit, Kujtim Gashi, tek Pishat e Sllatinës në Fushë-Kosovë sot kanë bërë vendosjen e gurthemelit të “Muzeut të Historisë së Natyrës”, kostoja e të cilit kap shifrën mbi 2 milionë euro.
Kryeparlamentari Kadri Veseli, tha se ndërtimi i këtij muzeu i bënë qytetarët e Kosovës të mos ndihen inferior ndaj asnjë kulture dhe përmirëson jetën e qytetarëve të Kosovës.
Veseli: Kjo vepër e përmirëson cilësinë e jetës së qytetarëve
"Po shkojmë drejt përmirësimit të shërbimeve për qytetarët tanë, të jetës së tyre por edhe në kuptimin cilësor edhe kjo vepër po ashtu e përmirëson cilësinë e jetesës së bashkëqytetarëve tanë duke pasur parasysh se Muzeu i Natyrës do jetë një pasurim i atij koleksioni të cilin e ka natyra jonë, duke i bërë ato eksponate pikërisht në një vend të përbashkët siç është ky investim afër 2 milionësh....Kosova po ecë përpara, ne do të ecim të gjithë bashkërisht me përkrahjen e njëri tjetrit", u shpreh Veseli.
Ministri i Kulturës, Rinisë dhe Sportit, Kujtim Gashi tha se sot po vënë gurthemelin e një muzeu natyror i cili i ka munguar Kosovës dhe vendeve të rajonit.
Gashi tregoi për koston e investimeve në këtë projekt i cili pritet të përfundoj brenda dy viteve, dhe i cili ka kapacitet për vendosjen e 400 koleksioneve.
Gashi: Ky investim kap shifrën 2 milionë euro
"Besoj që do të jetë një investim më shumë se 2 milionë euro, një projekt shumë kapital i cili ka vlera jashtëzakonisht të mëdha edhe të koleksioneve që do të zhvendosen këtu e që janë rreth 400 koleksione që parashihen të vendosen, pra ka një kapacitet të tillë dhe besojmë që gjatë këtij viti dhe vitit tjetër do i kemi këto punime dhe investime ta përfundojmë brenda periudhës dy vjeçare", tha Gashi.