Kryeministri i vendit Ramush Haradinaj dhe Zëvendëskryeministri Fatmir Limaj, të shoqëruar edhe nga deputeti i Kuvendit të Kosovës, Enver Hoti, sot kanë vizituar Komunën e Malishevës, ku janë pritur nga Kryetari i Komunës, Ragip Begaj dhe qeveria komunale. Ata po ashtu kanë vizituar edhe një prodhues, ku janë njoftuar me punën dhe aktivitetin e kompanisë “Ylli”, si një nga prodhuesit e suksesshëm, që eksporton prodhimet në Gjermani.
Fillimisht, në takimin e zhvilluar në zyrën e kryetarit Begaj, kryeministri Haradinaj dhe zëvendëskryeministri Limaj, janë njoftuar nga ana e kryetarit, me zhvillimet e përgjithshme në Komunën e Malishevës, për bashkëpunimin në mes të nivelit lokal dhe atij qendror, si dhe për nevojat që ka Komuna e Malishevës.
Kryeministri Haradinaj, e vlerësoi si shumë të rëndësishëm bashkëpunimin në mes të dy niveleve, si dhe ka thënë “Qeveria është e përkushtuar që edhe Malishevën ta përkrahë përmes projekteve konkrete, që ndikojnë në zhvillimin e përgjithshëm të Malishevës”.
Më pas, kryetari Begaj, i ka njoftuar krerët e Qeverisë së Republikës së Kosovës, me të gjitha nevojat që ka Malisheva, duke filluar nga problemi i furnizimit me energji elektrike, përkatësisht nevojën e ndërtimit të transformatorit 110 kilovatësh, për Malishevën, si faktor kryesor për zhvillimin ekonomik. Më pas e ka njoftuar edhe me çështje tjera, duke filluar nga nevoja për furnizim me ujë për pije, nga sistemet e ujëmbledhësve të mëdhenj, pastaj rregullimi i digës së liqenit në Mirushë, si një nevojë emergjente, problemi i pa zgjidhur i pronave, problemet me pagesat në fushën e arsimit, si rezultat i kontratës kolektive, e cila ndikon direkt në buxhetin komunal dhe çështje tjera. Kryetari Begaj, gjithashtu e ka falënderuar qeverinë e vendit, për investimet në Malishevë, investime të cilat ndikojnë direkt në jetesën e qytetarëve, si ndërtimi i qendrës së banimit kolektiv, ndërtimi i rrugës transite për Malishevën, zonën ekonomike dhe projektet tjera, përmes së cilave po ndihet përkrahja e qeverisë për Komunën e Malishevës.
Kryeministri Haradinaj, u interesua për të gjitha fushat e zhvillimeve në komunë, duke filluar nga energjia, uji, realizimi i buxhetit, pronat, sporti, kultura, dhe të tjerat, duke mos e lënë anash as bashkëpunimin në mes ministrive dhe komunës.
Më pas, kryeministri Haradinaj, zëvendëskryeministri Limaj, deputeti Hoti dhe kryetari Begaj, kanë vizituar edhe fabrikën e prodhimit të dyerve dhe dritareve “Ylli company” në Carrallukë ku janë njoftuar me aktivitetin e kësaj kompanie prodhuese. Sipas pronarit, Xhevat Hoti, kompania, më shumë se gjysmën e prodhimeve i eksporton në tregun gjerman, ndërsa ka të punësuar rreth 50 punëtor. Ai gjithashtu i paraqiti edhe problemet me të cilat ballafaqohet, duke u nisur nga problemi i furnizimit jo të mirë me energji elektrike, e që për të është problem më i madh që duhet të bëhet zgjidhje emergjente.
Në vizitën e tij në Malishevë, kryeministri Haradinaj, u zotua se për të gjitha kërkesat dhe nevojat e Komunës së Malishevës, do të angazhohet seriozisht për zgjidhjen e tyre, pasi qeveria në çdo mënyrë do të përkrahë zhvillimin ekonomik dhe zhvillimin e komunave.
