Në shenjë nderimi për veprën e martirëve që u pushkatuan para 77 vitesh në Remnik të Vitisë, sot në këtë vend përurorhet busti i udhëheqësit atdhetar të asaj kohe, dëshmorit Selim Sejdiu, dhe bashkëveprimtarëve të tij.
Me këtë rast, kryeministri në detyrë, Ramush Haradinaj, tha se me nderimin ndaj martirëve të pushkatuar më 1942, mbajmë të gjallë kujtimin për sakrificën shqiptare ndër breza.
“Përpjekjet për të drejtën e shqiptarëve në kohështrirje të ndryshme kanë njohur burra trima, luftëtarë e udhëheqës largpamës, të cilët me qëndresën e tyre ruajtën nderin e atdheut. Me nderimin ndaj martirëve të pushkatuar në Remnik të Vitisë, më 1942, mbajmë të gjallë kujtimin për sakrificën shqiptare ndër breza. Sot, në shenjë respekti për veprën e tyre kulmore për liri e bashkim, Remniku përuron bustin e udhëheqësit atdhetar të asaj kohe, dëshmorit Selim Sejdiu, dhe bashkëveprimtarëve të tij. Lavdi të gjithë të rënëve, që u flijuan në çdo periudhë të historisë kombëtare”, tha Haradinaj.
