Me kërkesë të kryetarit të Komunës së Obiliqit, Xhafer Gashi, sot është mbajtur një takim i përbashkët koordinues me KEK-un dhe Bankën Botërore.
Në këtë takim të pranishëm ishin edhe ushtruesi i detyrës së drejtorit ekzekutiv të KEK-ut Luigj Imeri dhe Shpresa Kastrati përfaqësuese nga Banka Botërore.
Në takim u diskutua për ndarjen e përgjegjësive dhe detyrave në realizimin e projektit të parkut multinacional që pritet të financohet nga Banka Botërore në vlerë prej 6 deri 8 milionë euro.
Palët nga ky takim u dakorduan që Komuna e Obiliqit dhe KEK të jenë bashkëfinancues të projektit, pasi që KEK ofron tokën ndërsa Komuna e Obiliqit do të hartojë projektin ideor dhe pas aprovimit nga Banka Botërore, do të hartohet edhe projekti detal.
Projekti i këtij parku multinacional parasheh shndërrimin e tokave të kontaminuara në hapësira gjelbëruese dhe përfshin një sipërfaqe prej 100 hektarësh të KEK-ut.
